Pine ‘auro le Silver Ferns ‘i Glasgow

‘Ua manumālō le Silver Ferns ‘a Niu Sila, ‘i le pine ‘auro ‘i netipolo ‘o Ta’aloga ‘a Mālō ‘o le Taupulega ‘i Glasgow, ‘ina ‘ua manumālō ‘i la lā su’egāfusi ma le ‘au ‘a Jamaica ‘i le vaveao analeilā ‘i ai ‘e 56 ‘i le 48.

‘Ua 16 tausaga fa’ato’ā toe mālō lea ‘o le Silver Ferns ‘i le pine ‘auro ‘i tā’aloga nei ‘a le Commonwealth.

‘O lenei manumālō, ‘o se la’asaga tāua mō le Silver Ferns, ‘i se taimi sili ‘ona tele ai faigatā ma fa’afītāuli ‘ua feagai ma le tā’aloga netipolo ‘i totonu ‘o Niu Sila.

‘E pei ‘ona silasila ma maimoa ‘i ai, sā lelei le fa’atinoga ‘o le ‘au ‘o le polokalame ma le fuafuaga fa’ata’atia mō lenei ta’aloga, mā ‘o le fa’alua ai lea ‘ona faia’ina ‘o le ‘au mālosi lenei ‘a Jamaica ‘i le Silver Ferns ‘i tā’aloga nei ‘i Sikotilani.

‘O lo’o gata mai ‘i tā’aloga ‘a le Taupulega ‘i le tausaga ‘e 2014, ‘ona su’efusi le Silver Ferns, mā ‘i totonu ‘o aso ‘e iva ‘e fitu tā’aloga sā feagai ai ma le ‘au ‘a Niu Sila ‘i Glasgow ma manumālō ‘uma ai, ‘e lēai se faia’ina.

‘E fai le su’egāfusi ‘ua toe to’a 11 le au, ‘ina ‘ua fa’amanu’alia le tama’ita’i ‘o Catherine Hall ‘i le tā’aloga ma Wales ‘i le Aso Tofi.

‘Ae sā le’i faia se suiga ‘e le tama’ita’i faiā’oga ‘o Dame Noeline Taurua ‘i le ‘au ‘e to’afitu ia na ‘āmata ‘i le tā’aloga ‘o le semifinal, lea na mālō ai ‘iā ‘Egelani.

‘O le ‘au ‘a Jamaica na o’o ‘i le final, ‘ina ‘ua faia’ina ai le Taimane  a Ausetālia  ‘i le lā semifinal.

‘O le 2010 ‘i tā’aloga ‘a le taupulega ia sā faia ‘i New Dehli ‘i ‘Initia, ‘o lo’o gata mai ai le pine ‘auro le Silver Ferns ‘a Niu Sila.

‘O le pine ‘apa memea ‘o tā’aloga netipolo ‘i Glasgow ‘ua maua ‘e ‘Ausetālia ‘ina ‘ua mālō ‘i la lā tā’aloga ma ‘Egelani ‘i ‘ai ‘e 68 ‘i le 50.

IMAGE/ATA: Silver Ferns Facebook.