Faia ‘e le Mālō ni suiga aogā ‘i le Polokalame ‘o le RSE

Na saunoa le Minisitā ‘o Femalāgā’iga Erica Stanford, ‘o suiga ‘o le ‘ā faia ‘i le Polokalame ‘o Gāluega Fa’avāitaimi, ‘o le ‘ā fa’afaigōfie ma manino ai ‘ona fa’aaogāina, ‘ae puipuia ai fo’i tagata faigāluega.  ‘E tusa ma le 17,000 tagata faigāluega fa’avāitaimi ‘i tausaga ta’itasi ‘e mafai ‘ona ‘aumaia ‘i Niu Sila ‘i lalo ‘o le polokalame mai ‘Āsia ma atumotu ‘o le Pasefika, ma faigāluega ai ‘i le tusa ma le 200 ‘o fale faigāluega. 

Na saunoa Stanford, ‘e manuia tele le polokalame peita’i ‘ua faigatā tele ma ‘ua ‘avea fo’i ma ‘avega mamafa.  ‘Ua faia ‘e le matāgāluega ni suiga ‘e aogā ma mafai ‘ona fa’atino, ‘e fa’afaigōfie ai tu’utu’uga, ma ‘ia fa’aleleia ai fo’i le tūlaga manino ‘o le polokalame, ‘ae lē gata ‘i lea, ‘e fa’amālosi ātili ai le puipuiga ‘o tagata faigāluega. 

Na aofia ai ‘i nei suiga se faiga fa’asolosolo po’o se polokalame ‘e fa’amaonia ma (graduated accreditation system) āmana’ia ai tagata ‘e ana gāluega ‘ua leva ‘ona lelei a lātou fa’amaumauga ‘i le tausisia ‘o tūlāfono, fa’apea fo’i ma le avanoa telē mō tagata faigāluega ‘e fa’afaigōfie ai ‘ona fesuia’i fale faigāluega ‘e gālulue ai.

‘O le ‘ā iai fo’i tūlāfono manino ‘e fa’atatau ‘i tupe ‘e mafai ‘e tagata ‘e ana gāluega po’o kamupanī, ‘ona toe maua mai ‘i tagata faigāluega, ‘e pei ‘o tau ‘o femalāgāa’iga, ‘inisiua ma nofoaga ‘e nonofo ai.

Na saunoa Stanford, ‘o nei suiga ‘o le ‘ā fesoasoani ‘i tagata ‘e ana gāluega ‘ina ‘ia taula’i le va’ai ‘i a lātou gāluega ‘autū, fa’amausalī le tūlaga mautinoa ‘i tagata faigāluega ma tagata ‘e ana gāluega, ma fa’atūmauina puipuiga ‘e mautinoa ai ‘e ‘ave pea le fa’amuamua ‘i tagata Niu Sila mō avanoa faigāluega ‘o lo’o avanoa.”

Na ia tā’ua fo’i ‘o lo’o gālulue le mālō fa’atasi ma le ‘aufaipisinisi ma pā’aga mai le Pasefika ‘e toe fa’afou tūlaga fa’ata’atia mō nofoaga ‘e nonofo ai tagata faigāluega ‘o le polokalame RSE (Recognised Seasonal Employer), fa’apea ma le fa’amālosia ‘o ‘au’aunaga lagolago ma le tausiga (pastoral care) mō ‘i lātou.

‘O nei suiga ‘o le ‘ā fa’amautinoa ai, o lo’o saunia ‘e tagata ‘e ana gāluega fa’avāitaimi, le avanoa e fa’aaogā ai le ‘initaneti mō tagata faigāluega.  Na saunoa Stanford, ‘ua fa’amoemoe ‘e maua le i’uga ‘i le fa’ai’uga o Sētema.  ‘O le ‘ā fa’atinoina ia suiga ‘i le ‘āmataga ‘o le tausaga 2027, ma fa’aauau pea se’ia o’o ‘i le 2029.

Link to RNZ (Article): https://www.rnz.co.nz/news/politics/818661/government-to-make-practical-changes-to-rse-scheme

IMAGE/ATA: RNZ / Louis Dunham