Feiloa’iga ‘a le Palemia ‘o Sāmoa ma Uēligitone

‘O le afiafi anapō na faia ai se fa’atasiga ‘a le Afioga ‘i le Palemia ‘o Sāmoa, La’aulialemalietoa Leuatea Fosi Schmidt, o le Konesula, Afemata Palusalue, le Afioga ‘i le Minisitā Fata Ryan Schuster ma le pa’ia lasilasi ‘o Sámoa e áumau ‘i  Uēligitone ‘i le fale talimālō o le Intercontinental ‘i Uēligitone.

Na tatala le avanoa ‘i le mamalu ‘o ē na aofia ‘e fa’asoa ma fai fesili aga’i le palemia. Na fesiligia ‘e nisi o le atunu’u le Palemia, ‘i matā’upu tau i le vae tama mai ‘o fānau mai Sāmoa, ‘o matā’upu ‘i le fa’atetele ‘o fuālā’au fa’asāina i Sāmoa fa’apea le faigatā ‘o le faiga ‘o visa ‘e malaga mai ai tagata mai Sāmoa.

Na saunoa le Palemia, ‘o vāega ia ‘o lo’o ‘ave ‘i ai le fa’amuamua ‘a le mālō. ‘O tūlaga fo’i ‘i fuālā’au fa’asāina, ‘o lo’o ūna’ia le pūlega ‘a nu’u ma le saofa’iga ‘a matai ‘i nu’u ma afio’aga, ‘ina ‘ia tutū mālosi ‘i le va’aiga ma le faiga ‘o tūlāfono ‘i nu’u, ‘e fesoasoani ai le tau tāofiofiga ‘o le fa’aaogāga ‘o fuālā’au fa’asāina.

Na taualuga le fa’amoemoe ‘i fa’aaloaloga mō le ‘au malaga. ‘O le aso fo’i ananafi na feiloa’i atu ai le Palemia o Sāmoa ‘i le Palemia ‘o Niu Sila iā Tuisinavemaulumoto’otua Christopher Luxon. Maua fo’i le avanoa ‘e feiloa’i atu ai ‘i le Komesina Maualuga ‘o Sāmoa ‘i Niu Sila ‘iā Afamasaga Fa’amatala Tole’afoa ma lana ‘aufaigāluega.

‘O le tāeao nei ‘o lo’o fai malaga atu ai ‘i Blenheim ‘e feiloa’i ‘i tagata malaga mai  ‘i gāluega fa’avaitaimi ‘o lo’o āumau ‘i lea vāega ‘o le atunu’u ‘o Niu Sila.

IMAGE/ATA: Anna Fa’asolo / SCR