Maua lau Easy Vote card ‘i le ‘imeli

‘Ua fa’ailoa mai e le Komisi ‘o faigā pālota ‘e fa’apea, ‘o le tausaga lenei, ‘o le ‘ā fa’amuamua le lafoina atu ‘o fa’amatalaga mō faigāpālota ‘i le ‘imeli mō le to’atele o tagata pālota, nai lō le lafo atu ‘i pusa meli ona māsani ai. Na saunoa le Komisi, ‘o le ‘ā lafo atu lau Easy Vote Card ma le lisi ‘o sui tauvā mō lou itūmālō fa’apālota ‘i lau ‘imeli. ‘E na’o i lātou e le’o iai ni ‘imeli ‘i fa’amaumauga, ‘o le ‘ā ‘otometi le lafoina atu ‘o pepa ‘i pusa meli.

‘Ua faitioina ‘e le Digital Equity Coalition ma le fa’alāpotopotoga  fa’atēkonolosi mō Māori le Te Hapori Matihiko nei suiga ‘i luga o le ‘initaneti, ma ‘ua lātou tu’ua’ia le Komisi o faigā pālota ‘i ia suiga fa’alilolilo ‘o ia auala mō le faigā pālota ‘ae le’i o’o le aso 7 o Nōvema. Na saunoa le so’o’upu ‘o le Ofisa Sili o Faigāpālota Karl Quesne, ‘o le fa’aitiitia ‘o ‘au’aunaga a le NZ Post ‘o sē tasi lea o māfua’aga ‘ua faia ai nei suiga.

Na fa’ailoa e le Komisi o Faigāpālota,’afai ua māe’a ona resitala lou igoa ‘i le lisi o tagata pālota a’o le’i o’o i le aso 4 ‘o Oketopa, ma o lo’o iai lau ‘imeli ‘i ā lātou fa’amaumauga, ‘o le ‘ā lafo atu lau Easy Vote card ma le lisi o sui tauvā ‘o lou itūmālo fa’apā;lota ‘i lau ‘imeli, ‘ae lē lafoina atu ‘i lau pusa meli. ‘O tausaga ua mavae na aofia i totonu ‘o lea afīfī le lisi ‘o sui tauvā ma nofoaga ‘e fai ai pālota.

‘E lē fa’amalosia le iai ‘o le Easy Vote card pe ‘ā e alu ‘e pālota, peita’i ‘ua fa’ailoa mai e le Komisi ‘e fesoasoani tele lea pepa ‘i tagata faigāluega ‘e vave ai le sa’iliga o lou igoa ma au fa’amaumauga ‘i le lisi ‘o tagata pālota ‘i le aso o le faigāpālota. Na tā’ua e le Komisi ‘e silia ma le 3.6 miliona tagata ua uma ona lesitala o le a maua tusi i le masina o Aukuso, e fa’amāonia ai ō lātou fa’amaumauga.

Link to RNZ (Article): https://www.rnz.co.nz/news/politics/723247/explainer-why-easyvote-cards-may-no-longer-be-mailed-to-you

IMAGE/ATA: RNZ / Angus Dreaver