Fa’aeaea aupito mauāluga ‘i ta’aloga – Ardie Savea

‘O le filifilia ai ‘o le ali’i ‘o Ardie Savea ‘e ‘avea ma Kapeteni ‘o le ‘Olopeleki ‘ua to’alua iai alo ‘o Sāmoa ‘ua ‘ausia lea tūlaga ‘i le tala fa’asolopito ‘o le ‘au lakapī ‘a Niu Sila.

‘E pei ‘ona silafia, ‘o Fa’alogo Tana Umaga lea na muamua, a’o lea ‘ua soso’o atu iai Ardie Savea, ‘o lā’ua ‘uma ‘o ni tama fanau ‘a le laumua ‘i Ueligitone.

‘E pei ‘ona silasila iai ‘i le TV, ‘o le Aso Gafua lea na fa’ailoa mai ai ‘e le ali’i faiā’oga ulu ‘o Dave Rennie le ‘au ‘a le ‘Olopeleki ‘ua filifilia mō ta’aloga ‘e tolu ‘i le māsina fou.

Sa fa’ailoa mai ai ma lē ‘ua filifilia ‘i le tofi kapeteni ‘o le ‘au ‘i lenei tausaga ma na fa’aalia ai ‘e Ardie Savea ‘i se talanoaga ma le ‘au fa’asalalau ‘o lenei tōfiga, ‘o se fa’aeaea aupito ‘i mauāluga lea ‘i mea tau ta’aloga ma sa ia ta’utino ai ‘o le ‘a ia taumafai ‘e gālulue fa’atasi ma ‘i latou ‘uma ‘o lo’o a’afia ‘i le ‘au ‘ua filifilia nei, ‘ae fa’apea ai ma isi na muamua atu ‘ina ‘ia fa’aauau ai pea ma fa’amālosia le tūlaga lelei ‘o le ‘Olopeleki.

‘O isi alo ‘o Sāmoa ma le Pasefika ‘o lo’o aofia ‘i le ‘au ‘a le ‘Olopeleki na fa’ailoa mai ‘ananafi, ‘o Asafo Aumua, Patrick Tuipulotu, Wallace Sititi, Anton Lienert Brown, George Bower, Pasilio Tosi, Tupou Vaa’i, Xavier Numia, Fehi Fineanganofo, ma Quinn Tupaea.

‘O le aso 4 ‘o Iulai le ta’aloga muamua ‘a le ‘Olopeleki ‘i lenei tausaga, lea ‘o le ‘a tā’a’alo ai ma le ‘au ‘a Falani ‘i Kalaiesetete.

‘O le Aso To’ona’i 11 ‘o Iulai le ta’aloga ‘e lua, ‘o le ‘a tā’a’alo ai ma le ‘au ‘a ‘Italia ‘i le malae ‘o le HNRY Stadium ‘i Ueligitone, ‘ona fa’ai’u lea ‘i le ta’aloga ma ‘Aiālani ‘e faia ‘i le Eden Park ‘i le Aso To’ona’i 18 ‘o Iulai.

‘O le māsina ‘o Nōvema lea ‘e malaga ai le ‘Olopeleki ‘i Europa ma ‘o le latou ta’aloga muamua ‘e fetaui ai ma Sikotilani ‘i le malae ‘i Murrayfield ‘i le Aso Sā le aso 8 ‘o Nōvema.

IMAGE/ATA: Ardie Savea Facebook