Tete’e tagata ‘i le fa’atauina ‘o ‘ele’ele fa’asaoina

‘E māfuli le mana’o ‘o le ‘au pālota ‘o Niu Sila, ‘e tete’e ‘i fuafuaga ‘a le faigāmālō ‘o lo’o iai nei ‘a Niu Sila, ‘e fa’atau’ese atu se vāega ‘o ‘ele’ele fa’asaoina ‘o lo’o iai ‘o le Mālō.

Na manino mai fo’i ‘i le taunu’uga ‘o se su’esu’ega ‘i manatu ‘o le ‘au pālota, ‘o faipule ‘e lagolagoina lea fa’amoemoe ‘o le mālō, ‘e ono le lagolagoina ‘i le taimi ‘o le pālota tele ‘o lo’o loma nei.

‘Ae pei ‘ona silafia, ‘o le Pili po’o le Tūlāfono Taufa’aofi ‘e teuteu ai le Tūlāfono ‘o le Si’osi’omaga, ‘e fa’aigoaina ‘o le Conservation Amendment Bill, ‘ua ‘i luma nei ‘o le Palemene, ‘ā fai ‘e pāsia, ‘o le ‘ā fa’atagaina ai ‘ona fa’atau’eseina atu le tusa ‘o le 60 pasene ‘o ‘ele’ele fa’asaoina ‘o lo’o iai nei ‘o Niu Sila.

‘O le su’esu’ega sa fa’atino ‘e le Vāega su’esuse, ‘o le Curia Market Research, na fesiligia ai manatu ma lagona ‘o tagata ‘e tasi le afe le aofa’i.

Na manino ai, ‘o le luavaetolu ‘o tagata sā fesiligia ‘e tete’e ‘i le fa’atau’eseina atu ‘o ‘ele’ele fa’asaoina, ‘ae na’o le 25 pasene lātou te lagolagoina.

Sā fa’ailoa mai muamua ‘e le Minisitā mō le Si’osi’omaga, ‘o Tama Pōtaka, ‘e lē sa’o le fa’a’upuga ‘e fa’apea, ‘o le ‘ā ‘ua saunia le faigāmālō ‘o lo’o iai nei, ‘e fa’atau’ese atu se vāega tele ‘o ‘ele’ele fa’asaoina ‘o le atunu’u.

Na tā’ua ‘e le ali’i minisitā, ‘o le agaga ‘o le teuteuga ‘o le tūlāfono pei ‘ona i luma nei ‘o le Palemene, ‘ina ‘ia manino ai pe ‘ā iloiloina le fa’atauina ‘ese atu ‘o ni ele’ele fa’asaoina, pē lelei ma talafeagai mō le puipuia ‘o le si’osi’omaga.

‘E lata ‘i le ‘afa ‘o tagata sā fesiligia ‘i lenei su’esu’ega, na lātou fa’aalia ‘e lātou te lē lagolagoina so’o se pātī lātou te lagolagoina le teuteuga lenei ‘o le tūlāfono ‘o le si’osi’omaga.

Link to RNZ (Article): https://www.rnz.co.nz/news/politics/614279/poll-two-thirds-of-voters-oppose-public-conservation-land-sales

IMAGE/ATA: RNZ / Marika Khabazi