Folafola ‘e le Leipa le maua fua ‘o talavai pe ‘ā toe manumālō ‘i le pālota

‘Ua folafola ‘e le vāega fa’a’upufai ‘a le Leipa, lātou te toe fa’afo’i le maua fua ‘o talavai ‘e lēai se totogi mō tagata ‘uma pe ‘ā manumālō mai le pālota tele iā Nōvema. Na fa’alauiloa ‘e le ta’ita’i ‘o le Leipa Chris Hipkins lea vāega, ‘ao iai ‘i totonu ‘o se faletalavai ‘i Upper Hutt ‘i le aoauli ananafi.

‘O le ‘ā mafai ‘ona maua fua talavai mai iā Iūlai ‘o le tausaga fou, ma ‘ua fuafua ‘e tusa ma le $74.5 mīliona tālā ‘i le tausaga ‘e fa’atupe ai. Na saunoa Hipkins – ‘O le ‘ā mafai ‘e tagata ‘ona va’ai fua le fōma’i ‘e ‘auala atu ‘i le Medicard fou ‘a le Leipa ma maua fua ā lātou talavai. ‘O le faigāmālō ‘a le Leipa na ‘amataina talavai maua fua ‘i lana pāketi ‘i le 2023.

Na matuā faitioina ‘e le National lea faiga fa’avae ‘i lenā taimi ‘ona sā manatu ‘e taugatā tele lona fa’atupega. Na lātou tā’ua, ‘e lē talafeagai le fa’atupega ‘e le mālō ‘o talavai mō tagata uma, na māfua ai ‘ona lātou folafola ‘e toe fa’afo’i le pili mō le talavai po’o le co-payment fee, ‘ae tu’u ‘ese ai ‘i lātou ‘e pito sili ‘ona mo’omia le fesoasoani.

Link to RNZ (Article): https://www.rnz.co.nz/news/political/598587/labour-vows-to-bring-back-universal-free-prescriptions-if-elected

CAPTION: Labour leader Chris Hipkins and health spokesperson Dr Ayesha Verrall
IMAGE/ATA: RNZ / Baz Macdonald