Tūmau pea fesili ‘a Peter Dunne ‘i le pili ‘a le minisitā $17,000 na paka ai ‘i le malae va’alele
Na saunoa se tasi na ‘avea ma minisitā, Peter Dunne, ‘e tele lava fesili ‘e le’i taliina ‘e uiga ‘i le fa’amatalaga ‘a le Minisitā mō Tamaiti Karen Chhour, ‘i lana pili ‘e lata ‘i le $17,000 na paka ai lana ta’avale ‘i le malae va’alele. ‘Ua faailoa mai ai fo’i le manatu fa’atauva’a ‘o nisi ‘o faipule ‘i tupe fa’aalu ‘o lea ‘e totogi ‘e le ‘au fai lāfoga, ‘i se taimi ‘o lo’o feagai ai tagata Niu Sila ma faigatā ‘i tūlaga tau tupe.
Na fa’aalia ‘i ni fa’amaumauga fou ‘o tupe fa’aalu, lea pei ‘ona ripotia muamua ‘e le The Press, le $16,686 na fa’aalu ‘e Chhour ‘i le paka ‘i le malae va’alele ‘i ‘Aukilani ‘i le vā ‘o Fepuari 2024 ma Fepuari 2026 ma ‘a tu’ufa’atasi taimi ‘uma na paka ai lana ta’avale, ‘e tusa ma le valu ma le ‘afa māsina.
Na saunoa Chhour ‘i le Stuff, ‘e sili ‘iā te ia le alu ‘o ia lava ‘ona ‘e sili atu ‘ona taugōfie nai lō le fa’aaogā ‘o ta’avale ‘a le mālō po’o ta’avale la’u pāsese, ‘aemaise lava le mo’omia ‘o le tele ‘o ana malaga ‘ona ‘o lona tūlaga tofi ‘o lo’o iai. ‘E maualuga atu ai le tupe ‘e fa’aalu ‘i paka ‘o ta’avale, peita’i, ‘e la’itiiti le tupe ‘a le ‘au fai lāfoga ‘e fa’aaluina ai pei ‘ona saunoa le tama’ita’i minisitā.
Peita’i na saunoa Dunne ‘i le polokalame ‘o le Checkpoint ‘a le Radio NZ, na ia tā’ua ai lona māsalosalo pe moni le aofa’iga ‘o le fuainūmera na fa’aaogā ‘i le fa’amatalaga ‘a Chhour ‘e fa’amatala ai le ‘auala na sefe ai tupe. ‘Aiseā na paka ai le minisitā ‘i paka ‘e pu’upu’u le taimi fa’atagaina, ‘ae lē paka ‘i paka ‘e ‘u’umi taimi fa’atagaina ‘auā ‘e taugōfie atu?
‘I fa’amaumauga ‘a le The Press, na tā’ua ai le $630 ‘o le pili aofa’i mō aso ‘e 15 na paka ai le ta’avale ‘a Chhour ‘i se paka ‘e pupu’u taimi ‘e fa’ataga ‘ona paka ai. Na līpotia fo’i ‘i le nusipea, ‘e 11 isi taimi na paka ai le ta’avale ‘a le minisitā ‘i le nofoaga lava ‘e tasi mō aso ‘e lima pe sili atu fo’i, ma ‘e silia ma le ta’i $300.
Na saunoa Dunne, ‘e fōliga mai ‘iā te ia, ‘e lē ‘o se fuafuaga lelei ma ‘e lē talafeagai fo’i.
Link to RNZ (Article) by RNZ Digital reporters: https://www.rnz.co.nz/news/political/597832/former-mp-peter-dunne-says-questions-remain-over-minister-s-17k-airport-parking-bill
CAPTION: Minister for children, Karen Chhour. (File photo)
Peter Dunne served in Parliament between 1984 and 2017. (File photo)
IMAGE/ATA: RNZ / Samuel Rillstone