Mana’o le ACT ‘e tele nisi gāluega ‘e tu’u atu ‘i fale talavai, fesoasoani ai ‘i fōma’i

‘Ua fa’atūina ‘e le Vāega Fa’a’upufai ‘a le ACT se finagalo ‘ina ‘ia tu’u atu ‘i fale talavai nisi matāfaioi mō le togafitiga ‘o gasegase, ‘e aofia ai le va’ava’ai lelei ‘o vai ma fuālā’au ‘o togafitiga mō gasegase tūmau fa’apea ai ma le siakiga ‘o le pa’u, ‘ina ‘ia tau tu’uitīitia ai le tele ‘o gāluega ‘a fōma’i.  ‘O se pōlisi lea na folafola ‘e le ta’ita’i, David Seymour ‘i le Northern Club ‘i ‘Aukilani ‘i le Aso Lua.

Na fa’asilasila ‘e Seymour ‘i le māsina ‘o ‘Aperila ‘e fa’apea ‘e ‘āmata atu ‘i le māsina ‘o Iuni, ‘o le ‘ā mafai ai ‘e fale talavai ‘ona faia togafitiga ‘e pei ‘o ulu ‘utua, ‘o mageso (scabies) ma togafitiga mō tagata ‘e lē lava le taumafa ‘i le vai auli.  ‘Ua finagalo Seymour ‘ina ‘ia fa’aopoopo atu ‘i ai ma siaki mō fatafata, a’afiaga ‘i taliga, ‘o a’afiaga ‘o le pa’u fa’apea ai ma ni tīgā ogaoga ‘e o’o ‘i ni vāega ‘o le tino. 

Na saunoa Seymour, ‘ā fai ‘ae faia ‘e i lātou ‘e gālulue ‘i faletalavai togafitiga, ‘e lē gata ‘e manuia ai le gasegase, ma fa’asaoina ai fo’i nisi siaki ‘e āga’i ai tagata ‘i fōma’i.  ‘E iai lava nisi gasegase ‘e mo’omia le va’ai ‘o se fōma’i po’o se GP ma ‘e iai fo’i nisi fa’ailoga va’aia ‘e mo’omia vave ai ni siaki peita’i, ‘o le uiga tonu lava lea ‘o le ‘ave ‘o le fa’amuamua ‘i le tagata ‘o lo’o pito sili ‘ona mo’omiaina vave le togafitiga pei ‘ona saunoa Seymour.

Link to RNZ (Article): https://www.rnz.co.nz/news/political/594306/act-wants-pharmacists-to-take-on-more-medical-services-to-help-out-gps

ATA: RNZ / Nick Monro