Lē toe iai se Moana Pasifika ‘i le 2027

‘I le Lakapi Supa, ‘o lea ‘ua fa’amaonia mai le fa’amutaina ai ‘o le fa’alepō mō le ‘au lakapi ‘a le Moana Pasifika.

‘O le Aso Lulu ‘ananafi lea na fa’ailoa mai ai fa’alaua’itele ‘e le pulega ‘o le Moana Pasifika, ‘o le fa’aletonu ‘o mea tau tupe ‘ua faia ai le fa’ai’uga ‘e fa’ata’ape, ‘e lē toe faia, le ‘au lakapi lenei ‘o le Moana Pasifika, pe ‘a ‘uma le ta’amilosaga ‘o lakapi supa ‘o le 2026, ‘o lo’o fa’agāsolo ‘i le taimi nei.

‘O lenei fa’ai’uga ‘ua fa’amatalaina, ‘o se aso pogisa mo le ‘au lakapi ma latou ‘uma ‘o lo’o a’afia ai ‘i le taumafaiga ‘o le Moana Pasifika.

‘Ua lima tausaga talu ‘ona fa’avaeina le fa’alāpotopotoga ‘e pulea ma fa’afoeina le Moana Pasifika, a’o lea ‘ua iai le fuafuaga ‘o le ‘a fa’amuta ‘e lē toe fa’aauauina ‘i le 2027 ‘ona ‘o fa’afitauli ‘i mea tau tupe ‘e fa’agaioi ai lea ‘au ‘o le ta’amilosaga ‘o lakapi supa.

‘O le fa’alāpotopotoga ‘a Fōma’i Pasefika, le Pacific Medical Association, po’o le PMA lea sā lagolagoina mālosi le ‘au, ma ‘o latou fo’i ‘e ona le Moana Pasifika, peita’i, ‘o lea ‘ua fa’ama’amulu le PMA ‘ona ‘e mana’omia se vāegatupe ‘e o’o ‘I le $10-miliona talā mo le fa’auauina ‘o lenei ‘au lakapi.

‘E tele faitioga ‘ua faia fa’asaga ‘I le pulega ‘o lakapi ‘a le lalolagi fa’apea ai ma le iuni lakapi ‘a Niu Sila ‘ona ‘o lenei mea ‘ua aliali mai.

‘Ua fa’aālia ai fa’alaua’itele ‘e le Pulenu’u ‘o Lower Hutt, ‘iā Fauono Ken Laban, ‘o le mea ‘ua tupu nei ‘I le ‘au ‘a le Moana Pasifika, ‘o se fa’anoanoaga tele mo le ta’aloga lakapi ma na te tu’uā’ia ai lakapi ‘a le lalolagi fa’apea ma le Iuni lakapi ‘a Niu Sila, ‘i le leai ‘o se taumafaiga ‘e mautinoa ai le iai pea ‘o se ‘au lakapi ‘e ta’u ai le pasefika, ‘i le ta’amilosaga ‘o lakapi supa ‘i totonu ‘o Niu Sila.

Peita’i, na tā’ua ‘i nisi lipoti ‘e le’i fa’amautaina, ‘e iai nisi fa’alāpotopotoga ‘o lo’o mānana’o latou te fia lagolagoina le fa’aauauina ‘o le ‘au lakapi lenei ‘o le Moana Pasifika ‘i le lumana’i.

Link to Moana Pasifika Press Release: https://moanapasifika.co.nz/moana-pasifika-set-to-conclude-super-rugby-chapter-at-the-end-of-the-2026-season/

ATA: Moana Pasifika / Facebook