Mana’omia ‘e le mālō Niu Sila manatu ‘o tagata tusa ‘o le fa’alētonu ‘o suāu’u ma penisini ‘i le lalolagi
‘O lo’o fia maua ‘e le Mālō Niu Sila manatu ma lagona ‘o le atunuu, ‘a’o faia taumafaiga ‘e sa’ili se fofō ‘o le tūlaga lē mautinoa ‘ua iai nei le sapalai ‘o suāu’u ma penisini ‘i le lalolagi ‘ātoa.
‘O lea ‘ua iai le fuafuaga fa’ata’atia ‘a le Mālō Niu Sila, ‘e tali atu ai ‘i le si’itia ‘o le tau ‘o le suāu’u ma le penisini ‘ona ‘o le taua ‘i Sasa’e Tūtotonu.
‘O lenei fuafuaga fa’ata’atia ‘a le Mālō Niu Sila, ‘e pei ‘ona fa’ailoa mai, ‘e fōliga ‘i le polokalame ma le tali atu’ a le Mālō ‘i le taimi na tūla’i mai ai le fa’ama’i mata’utia ‘o le Kōviti-19.
‘E fā vāega ‘o lea fuafuaga fa’ata’atia, ‘e mana’omia ‘ona fa’atino fa’asolosolo pe ‘ā āga’i ‘ina fa’atetele le fa’afītāuli.
‘O le taimi nei lā ‘o lea ‘ua iai nei Niu Sila ‘i le Vāega muamua po’o le Phase One ‘o lea Fuafuaga Fa’ata’atia ma ‘o lo’o fa’amamafaina mai ‘i fa’asalalauga ‘a le Mālō, ‘e fa’apea, ‘o lo’o lava ma totoe suāu’u ma penisini mō le atunu’u ‘ātoa, mā ‘e lē tatau ‘ona so’ona fa’atauina ma fa’aputu le suāu’u ma le penisini mai pamu penisini.
Peita’i lā, ‘o lea ‘e mana’o le Mālō ‘aemaise le Matāgāluega ‘o le Ministry of Regulation, ‘ina ‘ia fa’ailoa atu ‘e pisinisi, fa’apea tagata ‘e fa’aaogāina suāu’u ma penisini, ‘aemaise ‘o kamupanī ‘e fela’ua’ia ‘oloa ma le mamalu lautele ‘o le atunu’u, ‘ia ni fa’afītāuli ‘e ono āfāina ai le sōloga lelei ‘o lenei fuafuaga fa’ata’atia ‘a le Mālō.
‘O le matāfaioi ‘a lea matāgāluega, ‘ina ‘ia lelei le fa’atinoga ‘o aiāiga ma puipuiga fa’apitoa ‘e a’afia ai tūlaga ‘o le mālosi’aga ‘aemaise ‘o le suāu’u ma le penisini ‘i totonu ‘o le atunu’u ‘ātoa.
Na tā’ua ‘e le Minisitā ‘o lea matāgāluega, ‘o David Seymour, ‘o kamupanī ma pisinisi ‘e pei ‘o pamu penisini, ‘ātoa ai ma kamupanī ‘e fe’avea’ia ‘oloa, ‘aemaise ‘o konekarate ‘ātoa ma gāluega tau fa’ato’aga fa’apea ma fale’oloa tetele ‘e iai supamāketi, ‘o lātou ia ‘o lo’o naunau le matāgāluega ‘ia lelei a lātou feso’ota’iga ‘e vave ai ‘ona manino ‘i ni fa’afītāuli ‘e ono a’afia ai a lātou gāluega fai.
Sā tā’ua ‘e Seymour, ‘o lo’o naunau le Mālō So’ofa’atasi, ‘e fō’ia le toe aliali mai ‘o se faiga ‘e ono tāpunia ai ma loka gāluega fai ‘e pei ‘ona sā faia ‘i le taimi ‘o le fa’ama’i tele ‘o le koviti-19..
‘O le vāiaso ‘ua mavae, lea na fa’ailoa mai ai ‘e le faigāmālō, ‘e lata ‘i le 150,000 afe le aofa’iga ‘o ‘āiga faigāluega ‘e iai tamaiti, ‘o le ‘ā lātou maua se vaegātupe ‘e $50 Tālā fa’aopoopo ‘i le vāiaso, ‘i se fesoasoani fa’apitoa ‘a le mālō mō le taugatā ‘o le suāu’u ma le penisini.
Link to RNZ (Article) translated: https://www.rnz.co.nz/news/political/590938/ministry-seeks-regulatory-feedback-on-fuel-plan-to-avoid-red-tape-getting-in-the-way
ATA: RNZ / Samuel Rillstone