Talotalo le Warriors ‘e tāofi pea Roger Tuivasa-Scheck

‘E le’o muta taumafaiga ‘a le faiā’oga ‘a le NZ  Warriors Andrew Webster ‘e tāofi ai pea le ali’i ‘o Roger Tuivasa-Scheck pe ‘ā māe’a le ta’amilosaga ‘i le tausaga nei. 

‘O le tausaga talu ai, na āgiga ai ni fa’amatalaga ‘e iai le so’otaga ‘o le ali’i lakapī ‘i le tauvaga ‘o le R360 union lea ‘ua toe tolo atu se’ia aulia le 2028.  ‘Ua fa’amata’uina tama tā’a’alo ‘o le ta’amilosaga ‘o le NRL, ‘i se fa’asalaga ‘e 10 tausaga ‘e fa’asā ai ‘ona tā’a’alo pe ‘ā fai ‘e saini ‘i lea ta’amilosaga ‘o lo’o lagolagoina ‘e Saudi ma ‘e to’alāiti lava ‘ua fa’alauiloa lo lātou naunau ‘e fia ‘āuai ai. 

‘E māe’a le konekarate ‘a Tuivasa-Scheck ‘i le Warriors pe ‘ā māe’a le ta’amilosaga ‘i le tausaga nei.  ‘O le lua vāiaso talu ai, na lipotia ai le va’ava’ai ‘o le ali’i lakapī ‘i kalapu ‘a le NRL ‘i Sini.  ‘O ni fa’amatalaga pito lata mai na fa’aalia ai, ‘e fa’apea ‘o le ‘ā malaga atu ‘i le ‘au ‘a le Wakefield Trinity ‘o le Supa League ‘i Egelani. 

ATA: One NZ Warriors / Facebook.