Fa’amuta nisi malaga ‘a le Jetstar ‘i Niu Sila ‘ona ‘o le suāu’u

‘Ua taofia ‘e le Jetstar nisi ana faigāmalaga ‘i Niu Sila ‘ona ‘o le si’itia ‘o le tau ‘o le suāu’u talu ai le taua ‘i Sasa’e Tūtotonu.  Na fa’aalia ‘e se so’o’upu ‘a le Jetstar ‘i Niu Sila, ‘e 12 pasene ‘o ana ‘au’aunaga fa’atūlagaina, ‘ua a’afia ‘i ia suiga ‘e aofia ai nisi ‘o malaga ‘i le vā ‘o ‘Aukilani ma Kalaiesetete fa’apea ai le vā ‘o ‘Aukilani ma Uēligitone, fa’atasi ai ma nisi ‘o faigāmalaga fa’avāomālō ‘i le vā ‘o ‘Aukilani ma Sini fa’apea ‘Aukilani ma Brisbane.

‘O ia suiga ‘e lē tūmau ma ‘ua māe’a ‘ona fa’afeso’ota’i tagata ‘o lo’o a’afia ai a lātou malaga pei ‘ona saunoa le so’o’upu mā ‘o le to’atele fo’i, ‘ua māe’a ‘ona ofo atu ‘i ai ni malaga ‘o le aso lava lea ‘e tasi.

‘O le vāiaso nei lea fo’i na fa’ailoa ai ‘e le ‘Ea Niu Sila, ana faigāmalaga ‘e fā mō Sāmoa ‘ua lē fa’ataunu’uina.  ‘E iva malaga ‘a le ‘Ea Niu Sila mō Sāmoa ‘i vāiaso ta’itasi. 

Link to RNZ (Article) translated: https://www.rnz.co.nz/news/national/590576/jetstar-axes-some-new-zealand-flights-amid-fuel-price-surges

ATA: RNZ / Nate McKinnon