To’atele tagata ‘ua fa’aaogā pasi mō femalāga’iga

‘Ua mātauina le to’atele ‘o tagata ‘ua āga’i ‘e fa’aaogā ‘auala ‘o fela’ua’iga faitele, ‘e pei ‘o pasi ma nofoāafi ‘e femālāga’i ai, talu nei ‘ona ‘ua alu ‘i luga le tau ‘o le penisini ma le sāau’u ta’avale.

‘O le vāiaso na te’a nei na fa’aopoopo ai le 55 sene ‘i le tau ‘o le lita ‘o le penisini 91, talu ‘ona ‘āmata le taua ‘i Iran, ‘a’o le suāu’u po’o le diesel ‘e 90 sene na fa’aopoopo ‘i le tau ‘o le lita ‘e tasi ‘i lea lava vāitaimi ‘e tasi.

‘O ia si’itaga ‘ua fa’aopoopo mai ‘i le mauāluga ‘o le tau ‘o le soifuaga ma ‘ua tele ‘ina āfāina ai fuafuaga ‘a le to’atele ‘o tagata mō le tausiga māsani ‘i aso ‘uma.

Na fa’aalia ‘i se lipoti ‘a le Uaeālesi Fa’asalalau ‘a Niu Sila, ‘o le to’atele ‘o tagata ‘i totonu ‘o ‘a’ai tetele ‘o le atunu’u, ‘ua āga’i ‘e fa’aaogā pasi ma nofoāafi ‘e feoa’i ai, ‘e tau fesoasoani ai ‘i le taugatā ‘o le soifuaga ‘ua iai ‘i lenei taimi.

Līpotia mai le si’itia ‘o le aofa’iga ‘o pāsese femalāga’i ‘i pasi fa’apea ai ma nofoāafi  ‘e lē gata ‘i totonu ‘o le laumua ‘i Uēligitone, ‘ae fa’apēnā ai fo’i ma isi vāega ‘uma ‘o le itūmālō tele le Greater Wellington Region.

‘A’o le’i tūla’i mai le fa’alētonu ‘ua māfua ai ‘ona alu ‘i luga le tau ‘o le penisini ma le suāu’u ta’avale, sā mātauina se pa’ū ‘e tusa ma le 6 pasene ‘i le aofa’i ‘o pāsese femalāga’i ‘i pasi ma nofoāafi  ‘i totonu ‘o le itūmālō tele ‘o Uēligitone.

‘Ae ‘ua ‘avea le si’ita’i ‘o le tau ‘o le penisini ma le suāu’u ta’avale, fa’apea ai ma le mau fa’afītāuli tau femalāgā’iga ‘i ‘auala, ‘ona ‘o le gāluega ‘o ‘auala tetele ‘i Lower Hutt, ‘ua tūla’i mai ai se suiga lelei, ‘i le to’atele ‘o tagata ‘ua toe fo’i atu ‘e fa’aaogā ‘auala lautele ‘o fela’ua’iga ‘e pei ‘o pasi ma nofoāafi.

Link to RNZ (Article) translated: https://www.rnz.co.nz/news/national/590325/fuel-price-strains-send-public-transport-numbers-skyrocketing

ATA: RNZ / Mark Papalii