‘Oute lē fa’amavae – saunoa ai le Palemia Christopher Luxon

‘Ua fa’aālia ‘e se tasi sa ‘avea ma Failautusi ‘Autū tau Feso’ota’iga ‘a le patī ‘o le National, ‘o fa’alētonu ia na aliali mai ‘i le vaiaso na te’a nei, sa tele lava le āfaina ai ‘o le palemia ‘iā Christopher Luxon.

‘E lē gata ‘i lea ‘ae ‘ua fa’aālia fo’i ‘e se tasi ‘o le ‘au maitau lauulu ‘o mea tau ‘i ‘upufai’omālō, ‘o ia fa’alētonu ‘o le ‘a tatau ai ‘i faipule ‘o le National ‘ona māfaufau lelei, pe lē ‘o le taimi lenei ‘e tatau ai ‘ona sui lō latou ta’ita’i.

Na fa’ailoa mai ‘e le tama’ita’i ‘o Janet Wilson, lea sa ‘avea ma Failautusi ‘o Feso’ota’iga ‘a le National ‘i le taimi ‘o le ta’ita’iga ‘a Todd Muller fa’apea ma Judith Collins, ‘o le pa’u mauālalo ‘o le tūlaga lagolagoina ‘o le National ‘e ātagia ai manatu ma lagona ‘o le ‘au pālota ‘i le ta’ita’iga ‘a le ali’i palemia ‘o Christopher Luxon.

‘Ua ‘uma ‘ona fa’aālia mai fa’alaua’itele ‘e le ali’i palemia, Christopher Luxon, ‘o lo’o mālosi le lagolagoina ‘o ia ‘e lana kapeneta, mā ‘o lona tāofi, ‘e leai se mea ‘o le ‘a fa’amavae ai fua ‘o ia mai lona tofiga ‘o le ta’ita’i ‘o le patī ‘a le National.

‘O ia saunoāga ‘a le ali’i palemia ‘ua māfua, ‘ona ‘o le mau manatu fa’aālia ‘atoa ma talafe’avea’i ‘i luga ‘o feso’ota’iga televavave, ‘e uiga ‘i le tūlaga pa’u mauālalo ‘o le patī ‘a le National ‘i manatu ma lagona ‘o le ‘au pālota ‘o le atunu’u.

‘O le su’esu’ega lata mai nei ‘i le tūlaga lagolagoina ‘o vāega fa’a’upufai’omālō, sā fa’afoe ‘e le Taxpayers Union ma le Curia, na tūla’i mai ai le patī ‘a le National ‘i le 28.4 pasene, ‘o se pa’u lea ‘e lata ‘i le 3 pasene pe ‘a fa’atusa ‘i le tūlaga sā iai ‘i le sāili’iliga fa’apea sā faia ‘i le māsina na te’a nei.

‘O le patī ‘a le Labour na fa’aopoopo lona tūlaga lagolagoina ‘e le ‘au palota, lea ‘ua tūla’i mai ‘i lātou ‘i le āofa’iga ‘e 34.4 pasene, a’o le patī ‘a le Greens na fa’apea fo’i ‘ona si’itia ma o’o ai ‘i latou ‘i le āofa’iga ‘e 10.5 pasene.

‘E fa’apea fo’i le patī ‘a le ACT ‘e 7.5 pasene ‘o lo’o tūla’i mai ai a’o le patī ‘a Māori ‘e 3.2 pasene.

‘O le NZ First na pa’u la’ititi ‘i lalo le lagolagoina ‘e le ‘au palota ma tūla’i mai ai ‘i latou ‘i le āofa’iga ‘e 9.7 pasene ‘i lea su’esu’ega.

‘O ia fuainumera ‘e ‘o lona uiga ‘e 61 le āofa’i ‘o nofoa ‘e maua ai ‘e le Itū Āgai, a’o le faigāmalō so’ofa’atasi ‘o lo’o iai nei ‘e 59 nofoa, pe ‘ana fa’apea ‘e fai loa le palota mō se Palemene fou ‘i le asō.

‘O le taunu’uga ‘o le su’esu’ega lenei na fa’ailoa mai ‘i le fa’ai’uga ‘o le vaiaso lea sā īloga ‘ona fēsasia’i ai tali mai ‘a le ali’i palemia ‘i fesili ‘a le ‘au tusitala, ‘e fa’atatau ‘i le taua ‘i Iran.

Link to RNZ (Article): https://www.rnz.co.nz/news/top/588993/pm-christopher-luxon-facing-a-last-straw-scenario-commentators

ATA: RNZ / Marika Khabazi