Pāsia le Teuteuga ‘o le Pili mō Matā’upu tau ‘i Gāluega

Na saunoa le Minisitā ‘o Matā’upu Tau ‘i Gāluega, Brooke van Velden, ‘o ananafi ‘o se aso tele lea mō gāluega ‘i Niu Sila peita’i, na fa’aalia ‘e le Labour ‘o se aso fa’anoanoa tele ‘ae tali le Greens ‘o se aso pogisā. 

‘O ananafi na faia ai le faitauga fa’atolu ‘o le Teuteuga ‘o le Pili mō Matā’upu tau ‘i Galuega, (Employment Relations Amendment Bill) ‘i le Palemene.  ‘O nai māsina ‘ua mavae atu, na tē’ena ai ‘e le Fa’amasinoga Sili, le ‘apili ‘a le Uber ‘e fa’asaga ‘i le tagi ‘a ‘aveta’avale ‘i le māsina ‘o Nōvema ‘e fa’apea ‘o i lātou ‘o ni tagata faigāluega.

Na saunoa le tama’ita’i minisitā, ‘ua mafai ‘e lenei pili ‘ona ‘aumaia se tūlaga mautinoa mō itū ‘e lua pe ‘ā fai se konekarate ‘i tūlaga tau ‘i gāluega.  Na saunoa Van Velden, ‘ua mafai ‘ona manino ai, po’o se tagata ‘e fa’akonekarate po’o se tagata faigāluega. 

Peita’i, na fa’aalia le popōlega ‘o iuni ‘a tagata faigāluega ‘ona ‘o lalo ‘o lea tūlāfono fou ‘o le ‘ā telē lava le fa’amamafa ‘o aiaiga ‘i fa’a’upuga ‘o se konekarate ‘ae lē ‘o le tūlaga ‘o le so’otaga fa’alegāluega.  Na saunoa le ta’ita’i ‘o le Labour Chris Hipkins, ‘o le suiga ‘o lenei tūlāfono, ‘o le ‘ā ō ai tagata Niu Sila ‘i ‘Ausetālia, ‘e lelei ‘o lo’o telē ai le puipuiga ‘o tagata faigāluega, ‘ia ua fa’amālosi ‘e a lātou fale faigāluega ‘ona ‘avea ‘o ni tagata fa’akonekarate.  ‘E lē na’o ‘aveta’avale ‘a le Uber ‘o le ‘ā a’afia ai, ‘ae a’afia ai fo’i ma fela’uā’iga, gāluega tetele, tagata ‘e fa’amamāina fale, ‘o ē ‘e gālulue mō le puipuiga (security) ma tagata ‘o lo’o fa’afaigāluega ‘i gāluega leipa.

‘Ua sui ai fo’i ‘e le pili le fa’atūlagaga ‘o tagi ‘a tagata ta’itasi ‘e ala ‘i le fa’amālosiga ātili ‘o le iloiloga ‘o āmioga ‘a se tagata faigāluega ‘i le taimi ‘e fa’agāsolo ai lana talosaga.  Ma folasia ai se tapula’a ‘o le totogi ‘i le $200,000, ‘e agava’a ai se tagata faigāluega ‘e lāgā sana matā’upu pe ‘ā fai na lē sa’o ‘ona tuli pe fa’amālōlō ma se gāluega. 

Link to RNZ (Article) translated: https://www.rnz.co.nz/news/political/587106/employment-relations-amendment-bill-debated-for-final-time

ATA: RNZ / Samuel Rillstone