Si’itia maualuga fa’asalaga ‘i fa’alauiloaga taufa’asesē

‘Ua matuā fa’amālosia ‘e le Minisitā ‘o Tupe le Tūlāfono ‘o Fefa’atauā’iga Talafeagai, ‘e ala ‘i le fa’aopoopo ‘o nisi aiāiga, ‘ina ‘ia tulituliloa ai pea kamupanī ‘e faia ni fa’alauiloaga taufa’asesē ‘o ‘oloa.  ‘I lalo ‘o le tūlāfono ‘o lo’o iai nei, ‘e $600,000 le fa’asalaga ‘o se kamupani na te faia se fa’alauiloaga ‘o ni tau fa’apitoa ‘o ni ‘oloa, ‘ae ‘a ō atu tagata ‘e totogi fa’atau ‘e le’o mulimulita’ia ia tau pa’ū fa’apitoa. 

Na saunoa Nicola Willis, ‘e le’o lava le mālosi ‘o lea fa’asalaga, ‘e ano mai ai le au fai ‘oloa ia ‘e lē mulimuli ‘i le tūlafono.  ‘O le ala lea, ‘ua ia si’itia ai ‘i le $5 miliona le fa’asalaga.  ‘E manino lava la lātou taulogologo ‘i pisinisi, ‘ina ‘ia mulimuli ‘i le tūlāfono pei ‘ona saunoa le minisitā, ‘ā lēai, ‘ua iloa lava le i’uga ‘e o’o ‘i ai. 

Na faia le suiga ‘i le tūlāfono, ‘ina ‘ua līpotia ‘e le Commerce Commission, le lata ‘i le 23 pasene na si’itia ai le nūmera ‘o fa’aseā ‘i fefa’atauā’iga lē talafeagai ‘i le silia ma le lima tausaga ‘ua tuana’i.  ‘O le ‘āmataga ‘o le tausaga nei, na ‘ioe ai ni supamāketi se lua ‘a le Pak’n Save ‘i ni mōliaga se fitu ‘o le lē sa’o ‘o le faiga ‘o tau ‘o ‘oloa.  Na faia fo’i ‘e le komisi ni tagi ‘e fa’asaga ‘i le Woolworths ‘ona ‘o ni tau lē sa’o ma ni fa’apitoa taufa’asesē.

Link to 1News (Article) translated: https://www.1news.co.nz/2025/11/18/play-by-the-rules-huge-jump-in-fines-for-misleading-promotions/

ATA: SCR (file).