Siamupini Norrie Divine Mercy Williams ‘i le ta’amilosaga ‘a le International Taekwan-do Federation ‘i le lalolagi

‘O lagona fa’agae’etia ma le loto fa’afetai, na o’o iai le tāpua’iga ‘a ‘āiga, nu’u, Ekalesia ‘aemaise mātua o le tamaita’i 17 tausaga iā Norrie Divine Mercy Williams, ina ua manumālō ‘i le pine ‘auro o le ta’amilosaga ‘a le International Taekwan-do Federation ‘i le lalolagi, lea o lo’o talimālō ai Croatia. ‘O le aso 7 ‘i le aso 11 ‘o Oketopa ‘o lo’o fa’agāsolo ai le ta’amilosaga, ‘i vāega ‘ese’ese. ‘E to’a 26 tamaita’i na tauvā ma Divine ‘i le vāega ‘o le Individual Junior Female Power Breaking. ‘I le māe’a ai ‘o le ta’amilosaga muamua, ‘e to’a 14 tama’ita’i na sao mai.

Alu le ta’amilosaga lona lua sao mai le to’alima. Mai ‘i lea to’alima, ‘e na’o Divine na gau uma boards ‘e tolu mo le turning kick. ‘O Divine Norrie Williams e nofo ‘i Lower Hutt, ma e ā’oga ‘i St Marys. ‘O se alo ‘e fa’asino iā Hatesa Masinalupe Williams ma Vaafusuaga Etuale Williams, e mai ‘i afio’aga ‘o Alafua, Safa’atoa Lefaga ma Vailu’utai . ‘O se mitamitaga tele fo’i lea ‘i lana ‘aulotu ‘a Sagato Petelo ma Paulo ‘i le Palisi ‘a Te Awakairangi ‘i Lower Hutt, lea ‘o lo’o fa’afailele ai le ola fa’aleagaga ‘o Divine. ‘E lē gata fo’i ‘o se mitamitaga ona ua sisiina ai le tagāvai ma tāina le vi’i o Niu Sila, ‘ae o se alo ‘o Sāmoa ua fai ma ave fu’a ‘i le ta’amilosaga ‘o le Taekwan-do ma ‘avea ai ma siamupini ‘o le lalolagi, ‘i lea ta’aloga.

ATA: Supplied.