‘Ātoa le 60 tausaga talu ona fa’avae le a’ai ‘o Porirua

‘O le aso ananafi na ‘ātoa ‘iai le 60 tausaga talu ona fa’avaeina le a’ai ‘o Porirua, ma sā faia ai se sauniga fa’apitoa ‘i Pataka, ta’ita’iina lea e le pūlēgānu’u ‘o Porirua. ‘O le sauniga fa’apitoa sā tatala ‘i tagata lautele, ma na tipiina ai fo’i le keke ‘e fa’amanatu ai le aso fānau ‘o le a’ai. ‘O Reuben Friend mai le GM Community & Partnerships na fa’afeiloa’ia le aofia, soso’o ai ma le lotu na ta’ita’iina ‘e le kaumatua Ngati Toa – Dr Taku Parai. ‘I le saunoaga fa’apitoa ‘a lē ‘o lo’o avea nei ma pulenuu Anita Baker, sā ia fa’amatalatala ai nisi ‘o matāti’a ua ‘ausia ‘e le a’ai talu mai le 1965.

‘O le 1967 na ulua’i fausia ai le town centre, ‘ae tatala le fale sukalati tele ‘i Porirua, le Whittakers ‘i le 1969. Taunu’u mai le kamupani ta’avale ‘a le Todd Motors ‘i Porirua ‘i le 1975, fa’afaigāluega ai tagata ‘e to’a 1500 ‘i Porirua, ma fauina ai ta’avale ‘e 22,000 ‘i le tausaga. ‘O le 1976 na fausia ai le fale’aiga muamua ‘a le Mc Donalds ‘i Niu Sila, lea na tatala ‘i Porirua. ‘O le tele ‘o gāluega ‘o fale tetele ‘i Niu Sila na ‘āmata fauina ‘i le itu ‘i Sasa’e o le a’ai, ma Titahi Bay. ‘O le 1998 na tatala ai le fale mata’aga ‘a Pātaka ‘i totonu ‘o le ‘a’ai. ‘O nisi ia ‘o vāega na laualuga ‘i le saunoga ‘a Anita Baker, ‘e manatua ai nisi o matāti’a na ‘ausia ‘e le ‘a’ai mai tausaga ua te’a.

Sā manatua ai fo’i nisi o tagata lauiloa ’i ta’aloga ma isi polokalame, ‘e iai Jerry Collins, Michael Campbell, TJ Perenara, Patricia Grace, Neil Ieremia, Michael King, ma Elizabeth Knox. ‘O le fa’asoasoaina ‘o le keke sā tau’a’aoina ‘e le pulenu’u Anita Baker, ma nisi sā ‘avea ma pulenu’u muamua ‘o Porirua, ‘e aofia ai John Burke ma Jenny Brash. ‘O Johnny Naisbitt na fa’afiafia ‘i le fa’amoemoe. Ma sā fa’ai’u ‘i le iputī na tāpenaina ‘e le pūlēgānu’u a Porirua.

ATA: Anna Fa’asolo (SCR).