11 fa’asala ‘i le oti ‘i Saina

‘Ua fa’asalaina ‘e se fa’amasinoga ‘i Saina, ni tagata se to’asefulutasi ‘i le oti ‘ina ‘ua ‘āuai ‘i se taupulepulega ‘o solitūlāfono ‘e fa’atautaia ‘i totonu ‘o se ‘āiga, na tu’ua’ia ai ‘i ni ta’aloga faitupe ‘e lē fa’atagaina fa’apea ai ma ni faiga taufa’asesē ‘e aofia ai ni tupe aofa’i ‘e 1.4 piliona tālā ‘Amerika po’o le 2.4 piliona tālā Niu Sila, fa’atasi ai ma le fa’ao’o ‘o le oti ‘i ni tagata faigāluega ‘e lē ‘usita’ia a lātou taupulepulega.

‘E to’atolu ni tagata ‘e fa’apea ‘e mai se āiga ‘e mālosi tele ‘i Kokkang ‘i Myanmar ‘o lo’o aofia ‘i le to’asefulutasi ‘o le ‘ā fa’asalaina ‘i le oti.   

‘O faiga fa’asolitūlāfono ia na māliliu ai tagata faigāluega ‘e to’a 10 ma mānunu’a ai le to’alua ‘ina ‘ua taumafai ‘e sosola ‘ese ma nofoaga ‘e faia ai ia galuega taufa’asesē.  Sa fa’atino ai ni faiga taufa’asesē ‘i luga ‘o feso’ota’iga fa’atēkonolosi na fa’asesē ai tagata ‘i le lalolagi.  Sa o lātou ‘ave fa’agaoi ma ‘ave fa’amālosi tagata ‘e gālulue ‘i ni faiga taufa’asesē, ma ‘o se vāega ‘o aofia ‘i su’esu’ega ‘a le ‘ōfisa ‘o mālō ‘aufa’atasi ‘i fuālā’au fa’asāina ma solitūlāfono, lea ‘e iai le talitonuga ‘e tusa ma le 69 piliona tālā Niu Sila ‘e gau ai ‘i le tausaga. 

‘O lo’o su’e fa’atapito ‘e Saina nofoaga ‘autū ia ‘o lo’o fa’agaioi mai ai ia faiga taufa’asesē pei ‘ona gālulue fa’atasi ai ma leoleo ‘a Myanmar ma Thailand, ma sa mafai ‘ona fa’asa’oloto mai ai le silia ma le to’a 7000 ‘o tagata faigāluega, ma ‘o le to’atele lava, ‘o tagata sitiseni ‘o Saina.

Link to 1News (Article) translated: https://www.1news.co.nz/2025/09/30/china-court-sentences-11-members-of-myanmar-based-crime-syndicate-to-death/

ATA: SCR (file).