Saogalēmū pea paracetamol mō tinā ma’itaga ‘e ui ‘i saunoaga ‘a Trump

‘O lo’o saogalēmū pea le fuālā’au o le paracetamol mō tinā ma’itaga ‘e ui ‘i saunoaga ‘a Peresetene Donald Trump ‘e tusa ai ma le fa’amatalaga ‘a le Fa’alāpotopotoga ‘a fa’atōsaga ‘a Niu Sila, le NZ College of Midwives. 

‘O ananafi lava, na saunoa ai Trump le peresetene ‘o le Iūnaite Setete, ‘o le paracetamol lea ‘e togafitia ai ni tīgā ‘o le tino fa’apea ma le fiva, ‘e lē tatau ‘ona inuina ‘e tinā ma’itaga, ‘ona ‘e iai le so’otaga ma le alu ‘i luga ‘o tūlaga lamatia ‘o fānau iti ‘i le a’afiaga ‘e ta’ua ‘o le autism, po’o tamaiti ‘e ‘ese lava fo’i le ātina’ega ‘o o lātou fāi’ai.  Sa iai fa’atasi le peresetene ma le Failautusi ‘o le Soifua Mālōlōina ‘a ‘Amerika, Robert F Kennedy Jr, lea na ‘āmataina le su’esu’ega ‘i māfua’aga ‘uma lava ‘o autism.

Na tā’ua ‘i līpoti ‘a le Associated Press, ‘e lēai ni fa’amaoniga ‘o maua, ‘e le’o iai fo’i ni mau fou ‘e iloa ai le sa’o ‘o ia talitonuga po’o folasaga ‘a Trump.  ‘O le tali ‘a le fa’alāpotopotoa ‘o fa’atōsaga ‘a Niu Sila, ‘e fa’apea, ‘o ni mau fa’asaienitisi iloga ‘o lo’o iai, ‘e lē’o iai se so’otaga ‘i le vā ‘o le paracetamol ma lea fa’afītāuli ‘o le soifua mālōlōina.  Mā ‘o le paracetamol, ‘e pito sili ‘ona saogalēmū mō tinā ma’itaga pe ‘ā lagona le tīgā ‘o le tino pe maua fo’i ‘i le fiva. 

Na fa’aalia ‘e Dr Ian Town, le Faufautua Sinia Fa’asaienisi ‘a le Matāgāluega ‘o le Soifua Mālōlōina ‘a Niu Sila, ‘e le’o suia la lātou fautuaga mā ‘o lo’o fa’aauau pea ‘ona ‘avea le paracetamol ma fuālā’au pito sili ‘ona saogalēmū mō tinā ma’itaga.

Na lāgā fo’i ‘e Trump ni popolega lē fa’avaea ‘e uiga ‘i tui puipui ‘e fa’apea ‘o se tasi ‘o māfua’aga ‘e alu ai ‘i luga le nūmera ‘o tamaiti ‘i le autism, lea ‘ua a’afia ai le 1 ‘i le 31 tamaiti ‘i le Iūnaite Setete. 

Link to 1News (Article): https://www.1news.co.nz/2025/09/23/paracetamol-safe-during-pregnancy-despite-trump-claims-nz-midwives/

ATA: SCR (file).