Fa’amoemoe kamupanī ‘a le Sealord ‘e tapuni lona falei’a ‘i Nelson

‘O le fuafuaga ‘a le kamupanī, ‘o le Sealord, ‘e tāpunia lona falei’a, le coated fish factory ‘i le ‘a’ai ‘o Nelson, ‘o le ‘ā āfāina ai gāluega ‘a tagata ‘e to’a 79 le aofa’iga ‘o lo’o gālulue ai ‘i lea pisinisi ‘i le taimi nei.

‘O le Aso Faraile na te’a nei na fa’ailoa ane ai ‘e le pūlega ‘o le Sealord ‘i le ‘aufaigāluega ‘e to’a 52 ‘i totonu ‘o le falei’a, ma le isi to’a 22 ‘i totonu ‘o le pūlega ma le ‘ōfisa, ‘o le ‘ā ‘āmata fa’atalanoaga ‘e tusa ‘o le lumana’i ‘o ā lātou gāluega, ‘ona ‘o lenei fuafuaga .

Sā fa’aalia fo’i  ‘i lenei fa’asilasilaga ‘a le kamupanī ‘a le Sealord, ‘o le fuafuaga lenei, ‘e lē a’afia ai ana gāluega tau faigā faiva ‘i le vasa loloa, ‘ae fa’apea fo’i ma le vāega ‘o lo’o tu’u’apa ai le i’a ‘o le tuna.

Na tā’ua mai ‘e le ali’i pule, ‘i Doug Paulin, ‘ua māfua lenei fuafuaga, ‘ona ‘o le maualuga ‘o le tau ‘e fa’atino ai gāluega ma isi vāega ‘e aafia ai le tau ‘i supamāketi mō ā lātou ‘oloa gaosi.

Sā fa’amamafaina ‘e le ali’i ‘o Paulin, ‘e lē mala’ese la lātou kamupanī ma le tele ‘o isi kamupanī ma pisinisi ia ‘ua taupōnia talu ai nei ‘i totonu ‘o Niu Sila, ‘ona ‘o tūlaga fa’alētonu tau ‘i le tamāo’āiga.

Na fa’ailoa mai ‘e le ali’i Pulenu’u ‘o Nelson, ‘o le fa’amutaina ‘o gāluega tūmau ‘a tagata ‘e to’a 79 ‘i lea vāega ‘o le pisinisi’ a le Sealord, ‘o se tūlaga ‘ua matuā telē le āfāina ai ‘o lea vāega ‘o le atunu’u.

Sā tā’ua ‘e le ali’i pulenu’u, ‘ua soso’o lenei fuafuaga ‘a le Sealord ma le fa’ai’uga ‘i le Aso Tofi talu ai ‘a le kamupanī ‘o le Carter Holt Harvey, ‘e tāpunia lona ‘ili laupapa ‘i le Eves Valley ‘i le itūmālō ‘o Tasman, lea ‘o le ‘ā a’afia ai le 140 ‘o tagata faigāluega ‘o gālulue ai nei.

Link to RNZ (Article) translated: https://www.rnz.co.nz/news/business/572228/sealord-proposes-closure-of-coated-fish-factory-in-nelson

ATA: Sealord NZ (RNZ).