‘Aua le tu’uina ata ‘o ā ‘outou fanau ‘i luga ‘o ‘upega ‘o feso’ota’iga

‘Ua lapata’ia ‘e se leoleo su’esu’e Scott Beard mātua,’ ia ‘alo ese mai le tu’uina ‘o ata ‘o tamaiti ‘i luga ‘o ‘upega ‘o feso’ota’iga lautele, ‘ona ‘ua si’itia ‘i luga le nūmera ‘o ata ‘o tamaiti ‘e fa’aāogāina ‘e le AI po’o le poto fa’afōliga ‘o masini tekonolosi. Fa’aālia ‘e Beard, ‘ua fa’aāogāina ‘e le AI ata ‘o tamaiti Niu Sila, ‘e fa’aālia mai ni ata ‘o va’aia ‘o ‘ave’esea lavalava tūlou.

‘O ia ata ‘ua faia ‘e le AI, ‘ua fa’afesui’ai ma tagata ‘ia ‘e faia sauāga matagā ‘i tamaiti. ‘Ua fa’aāogāina fo’i ‘e tagata ata ‘o tamaiti ‘e fa’aleaga pe fa’afefe ai tamaiti ‘i luga ‘o ‘upega ‘o feso’ota’iga. ‘E lē gata ‘i lea, ‘ua ālia’e i luga le ‘ave fa’amālosi ‘o tamaiti ‘i totonu ‘o le atunu’u. ‘O le fautuāga ‘a Beard, ‘e fa’amālosi mai ‘i mātua, tautuanā ‘aua le tu’ua ata ‘o tamaiti’i luga ‘o ‘upega ‘o feso’ota’iga lautele, ‘ona ‘o le lē saogalemu.

‘O le to’atele ‘o tagata ia ‘e faia ia solitūlāfono, ‘ua pepelo ma fa’aāogā ata ‘o talavou ta’i 15 tausaga ‘e fai ai ā latou profiles, peita’i ‘o se taule’ale’a 50 ma ona tupu tausaga, ‘o lo’o tau maileiīna mai tamaiti ‘i luga ‘o ‘upega ‘o feso’ota’iga. ‘O le isi vāega ‘o le fa’asoa ‘a Beard ‘i luga ‘o le polokalame ‘a le 30 with Guyon Espiner, ‘e fa’apea ‘ua sao mai ‘i ‘auala ‘ese’ese le fa’aāogāina ‘o masini pu’eata nini’i, ‘e fa’alafi ‘i totonu ‘o peni ma fa’amau, ‘e pu’e fa’alilolilo ai ata ‘o tamaiti ma tagata lautele.

Link to RNZ (Article) translated: https://www.rnz.co.nz/news/national/564433/top-detective-scott-beard-s-stark-warning-to-parents-don-t-put-your-kids-online

ATA: SCR (file).