Lagolagoina le fa’aaogāina ‘o ata ‘o tagata fa’atau

‘E lagolagoina ‘e le tele ‘o pūlega ‘o supamāketi ma fale’oloa tetele ‘i totonu ‘o Niu Sila, le fa’aaogāga o le tēkonolosi fa’aonapō nei, ‘e iloa gōfie ai fōliga ‘o tagata fa’atau ‘i totonu ‘o lātou fale’oloa.

‘Ua tu’uina mai lea fa’aaliga ‘a i lātou ia, ‘ina ‘ua ‘uma ‘ona fa’ailoa mai  le talia lea ‘e le Komesina ‘o Matā’upu Tōtino, le Privacy Commissioner, ‘o le faia ‘o se fa’ata’ita’iga ‘o lēnei faiga fou, ‘i totonu ‘o supamāketi ‘a le New World faa’pea ma le Pak and Save.

‘O se fa’aaliga tusitusia ‘i le ‘upega ‘o feso’ota’iga ‘a le fa’alāpotopotoga ‘o le ‘aufaipisinisi, le Retail New Zealand, na tā’ua ai ‘e lagolagoina ‘e supamāketi tetele ‘uma, le fa’aaogāga lea ‘o faiga fou fa’atēkonolosi, ‘e puipuia ai a lātou tagata faigāluega ‘ae fa’apea ai ma tagata fa’atau.

‘E le’i fa’ailoa mai po’o le ā tonu le taimi ‘o le ‘ā ‘āmata ‘ona fa’aaogāina lea faiga fou, ‘ae na tā’ua ‘e fa’apea, ‘o le ‘ā gālulue nei ‘i lātou ‘e ātīna’e se faiga ‘e aupito ‘i sili ‘ona lelei mō lona fa’aaogāina.

 Peitai lā, na fa’ailoa mai ‘e le Privacy Commissioner, ‘o Michael Webster, ‘o lana līpoti ‘e tusa ai ‘o le matā’upu lenei, ‘e lē fa’apea ‘ua tatala ai le fa’aaogaga ‘o le faiga lenei ‘e tā’ua ‘i le gagana Peretānia, ‘o le facial recognition technology, po’o le tēkonolosi ‘e faigōfie ai ‘ona iloa fōliga ‘o se tagata.

Link to RNZ (Article) translated: https://www.rnz.co.nz/news/national/564201/facial-recognition-technology-supported-by-big-name-retailers

ATA: RNZ