To’atele māliliu ‘i le va’alele na pa’ū ‘a le Air India ‘a’o iai le pāsese ‘e to’a 242

‘Ua lipotia ‘e na’o le to’atasi se tagata na fa’asaoina mai le pāsese ‘e to’a 242 ‘a se va’alele ‘a le Air India lea na pa’ū ‘i ni nai minute talu ‘ona tu’uva’a ‘ese atu ma le malae va’alele ‘i Ahmedabad fa’amoemoe mō Lonetona ‘i le po anapō taimi Niu Sila.  Na lipotia na pa’ū le va’alele ‘i luga ‘o ni fale ‘e nonofo tūmau ai ‘aufaigāluega ‘i falema’i, ma māliliu ai ma nisi fo’i tagata mai lea fale.  ‘O le taimi nei, ‘ua to’a 260 tagata māliliu.

‘Ae ‘ina ‘ua tuana’i ni nai itūlā talu ‘ona tupu le fa’alavelave ma ‘ua māe’a fo’i ‘ona faia se saunoaga ‘a leoleo ‘e fa’apea ‘e fōliga mai ‘e lēai se tagata na fa’asaoina, ‘ae va’aia loa se taule’ale’a ‘ua savali ‘ese mai le mea ‘o tupu ai le fa’alavelave, mā ‘o se tūlaga na faigatā tele ‘ona talitonuina.  Na fa’amaonia ‘e le failautusi ‘o le matāgāluega ‘o le soifua mālōlōina, ‘e to’atasi le tagata na fa’asaoina lona soifua mai le fa’alavelave.  Ma nā tā’ua fo’i ‘i tala fou ‘a le Leitiō Niu Sila ‘i le taeao analeilā, sa vala’au le taule’ale’a ‘i lona ‘āiga ‘i Lonetona, ‘e ta’u ‘i ai, ‘o lo’o saogalēmū.

 ‘Ae ‘o le ‘aumalaga ‘a le va’alele ‘e to’a 242 ‘e aofia ai le to’a 217 ‘o tagata mātutua ma tamaiti ‘e to’a 11 pei ‘ona fa’aalia ‘i se līpoti ‘a le Reuters.  ‘E to’a 169 ‘o tagātā nu’u ‘Initia, 53 Peretānia, to’afitu Potukale ma le Kānata ‘e to’atasi pei ‘ona tā’ua ‘e le Air India.  Na fa’aalia ‘e fa’apea ‘o se va’alele ‘o le itū’āiga ‘o le Boeing 787-8 Dreamliner, ‘o se tasi ‘o va’alele ‘o itū’āiga fou ‘e la’u ai pāsese.  Na ‘ave ‘i falema’i lata ane tagata mānunu’a pei ‘ona iai ‘i lipoti.

Link to RNZ (Article): https://www.rnz.co.nz/news/world/563962/air-india-dreamliner-crashes-into-ahmedabad-college-hostel-kills-over-240

ATA: Handout / CENTRAL INDUSTRIAL SECURITY FORCE (CISF) / AFP / RNZ