Maua lana $40,000 ‘i WoFs pepelo, ‘ae fa’asala ‘i le nofo va’ava’aia ‘i lona ‘āiga

‘Ua fa’asalaina se taule’ale’a ‘i ‘Aukilani ‘i se fa’asalaga ‘e fa’afalepuipui pe nofo va’ava’aia ai ‘i lona ‘āiga, ‘ona ‘o lona faia ‘o ni pepa pepelo ‘e iloa ai ‘o ni ta’avale ‘ua saogalēmū ‘i feoā’iga ‘i luga ‘o ‘auala tetele (warrants of fitness).  ‘E silia ma le 40,000 tālā na ia mauaina mai ia pepa pepelo.  Na fa’asalaina Imroz Taki, ‘e ana le pisinisi ‘o le Newmarket Automotive Repairs, ‘ona ‘e 677 le aofa’iga ‘o Warrants of fitness na ia faia ‘i le vā ‘o le aso 9 Tēsema 2022 ma le aso 6 Iuni, 2023, ‘e ui ‘e le’i filifilia pe fa’amaonia le ‘avea ‘o ia ma tagata ‘e iloiloina ta’avale po’o talafeagai ‘ona feoa’i ‘i luga ‘o ‘auala tetele. 

‘E ta’i $60 na totogi ai le pepa ‘e tasi.  Na māua ‘e le ‘au su’esu’e ‘a le Lālā ‘o Fela’uā’iga po’o le NZTA, na fa’aaogāina ‘e Taki le pepa fa’amaonia ‘o se isi tagata faigāluega sā galue muamua ai, peita’i ‘e le’i māe’a ma se su’esu’ega ‘e tasi ‘o ia vāega na ia faia.

Na vave ‘ona fa’alēaogāina ‘e le NZTA le pule ‘e mafai ‘ona su’esu’eina ma iloilo ai ‘e le Newmarket Automotive ni ta’avale, ma fa’alēaogāna fo’i ni Warrants of Fitness na tu’uina atu ‘e Taki ‘i lea vaitaimi.  Na logoina ‘aveta’avale na a’afia ‘i le gāioiga ‘a lea taule’ale’a, ma toe ‘ave a lātou ta’avale ‘e toe siaki, ma sā fa’ailoa ai, le tele ‘o ta’avale na iai fa’alētonu. 

Na saunoa Nicole Botherway ‘o le pūlega ‘a le NZTA, ‘o gāioiga ‘a Taki, ‘ua lamatia ai le saogalēmū ‘o tagata ‘e ana ta’avale, ‘o pāsese ma isi tagata ‘e fa’aaogāina ‘auala tetele.

Link to NZHerald (Article) translated: https://www.nzherald.co.nz/business/auckland-man-gets-home-detention-after-earning-40000-issuing-fraudulent-wofs/PE76APNHRJB3PFBGICMAE6EUFA/#google_vignette

ATA: NZHerald.