Uiga loulouā ‘o le tau ‘i le atunu’u

‘O le mālolosi ‘o savili na lelea ai le taualuga ‘o se fale ‘i Newlands ‘i le itūmālō ‘o Uēligitone, ma ‘ua lē mafai ‘ona toe nofoia.  Na fa’aalia ‘e Belinda Beets ‘o le vāega Tineimū ma Gāluega fesoasoani mō Fa’alavelave Fa’afuase’i, na lelea le taualuga ‘o le fale mai Sunhaven Drive āga’i ‘i Tamworth Crescent ma palasi ‘i luga ‘o se isi fale.  ‘E lēai se tasi na manu’a ai.   

Na lipotia ‘e lēai se vaega ‘o le fale lea na pa’ū iai le taualuga ‘o le fale mai Sunhaven Drive na fa’aleagaina peita’i ‘o le ‘ā toe siaki lelei ‘i le asō.  Na tā’ua ‘e Beets, na’o le pau lea ‘o se vala’au na o lātou mauaina ‘ona ‘o tūlaga fa’alētonu ‘o le tau ‘i le vāega ‘ōgātotonu ma le pito ‘i lalo ‘o le Motu ‘i Mātū ‘i le pō anapō. 

‘Ua fa’alēaogāina lapata’iga mō faititili ma matagi mō Bay of Plenty.  ‘Ae fa’ailoa lapata’iga ‘o faititili ma savili mālolosi mō Opotiki, Gisborne ma Whakatane.

Ae silia ma le 300 ‘āiga ‘i Northland na motusia la lātou ‘eletise.  Na fa’atūlagaina ‘e le ‘ōfisa vā’aitau ni lapata’iga mō savili mālolosi ma le kiona ‘i nisi ‘o vāega ‘o le Motu ‘i Saute.  ‘O le ‘ā si’itia fo’i le mālūlū ‘e lē māsani ai, mō lenei taimi ‘o le tausaga.  ‘O lo’o iai ni lapata’iga ‘o savili mālolosi mō le itūmālō ‘o Tararua mai le 8 ‘e o’o atu i le 6 i le afiafi ā nānei ma le lapata’iga ‘i le lanu moli ‘o savili mālolosi mō Uēligitone ma Wairarapa ‘e o’o atu i le 9 ‘i le taeao nei.  ‘Ua fa’aalia fo’i ‘e le MetService, ‘e ono vave si’isi’i le maualuga ‘o le tatafe ‘o vaitafe, sōloga ‘o palapala ma faigatā ai feoā’iga ‘i ‘auala tetele. 

Link to RNZ (Article) translated: https://www.rnz.co.nz/news/national/563110/live-power-cuts-flood-threats-as-storm-hits-from-northland-to-wellington

ATA: Supplied / Civil Defence Taupō (RNZ).