‘E toe fo’i mai tagata Niu Sila na tā’o’oto ‘i fafo ‘e fa’apa’ū o lātou mamafa, ma nisi a’afiaga ogaoga ‘e ono o’o ‘i ai

‘E toe fo’i mai tagata Niu Sila ia na malaga ‘i atunu’u ‘i fafo ‘e fai o lātou ta’otoga ‘e fa’aitīitia ai o lātou mamafa, ma ni fa’afītāuli ogaoga ‘e ono a’afia ai o lātou soifua ‘i se taimi mulimuli mai.  ‘Ua ātili ‘ona mamafa ai le ‘avega, ‘i le ‘au’aunaga ‘o le soifua mālōlōina lautele ‘a le atunu’u, pei ‘ona fa’aalia ‘e se fōma’i ‘e faia ia itū’ā’iga ‘o ta’otoga ‘i Waikato. 

Na fa’aalia ‘e Dr Rowan French, ‘ua fa’atūtū gāioiga ‘a kamupanī ‘e fa’apitoa mō tagata ‘e malaga ‘i atunu’u ‘i fafo mō ta’otoga, ‘ae māsani ‘ona lē malamalama ‘āto’atoa ‘i tūlaga ogaoga ‘e ono o’o ‘i ai, po’o le tūlaga mo’omia ‘o nisi ta’otoga pe ‘ā toe fo’i mai ‘i o lātou ‘āiga. 

‘E lē gafatia ‘e le to’atele le $29,000 pe ‘ā fai ‘o se ‘au’aunaga fa’atūma’oti, ‘e faia se ta’otoga ‘e fa’aitīitia ai le mamafa ‘o le tino, ‘o le ala lea ‘e āga’i ai ‘i Mexico, Thailand ma Turkey mō ta’otoga taugōfie atu, ē tusa lea ma le ta’i $8000.

Na tā’ua ‘e se tasi tama’ita’i ‘i Waikato, ‘o le ta’otoga ‘e ‘ave’ese ai se vāega ‘o le manava ‘e fesoasoani ‘e fa’apa’ū ai le tino mamafa po’o le gastric sleeve surgery ‘i totonu ‘o Tijuana, ‘e le’o se fa’ai’uga sa faigōfie ‘iā te ia.  ‘O ia ‘e galue ‘i le soifua mālōlōina, ma sā va’ava’ai ‘i itū ‘uma, ma ‘e iai lava ni tūlaga ogaoga ‘e ono tutupu ‘i so’o se ta’otoga.

Link to RNZ (Article) translated: https://www.rnz.co.nz/news/national/542275/kiwis-return-from-overseas-weight-loss-surgery-with-life-threatening-complications

ATA: Dr Rowan French / Supplied (RNZ).