Fa’alauiloa ‘e le Mālō ‘o le Atu Kuki au’ili’īliga ‘o le māliliega ma Saina

‘Ua fa’alauiloa ‘e le mālō ‘o le Le Atu Kuki fa’amatalaga ‘o le māliliega ‘o le Comprehensive Strategic Partnership na sainia ma Saina. 

‘O gāluega fai fa’atasi ‘i le ‘eliga ‘o le alititai ‘o le sami mō minerale, ‘o a lā sui fa’alemālō ‘i totonu ‘o atunu’u ‘e lua,  ma le sili atu ‘o le va’aiga ‘o le isi atunu’u nai lō isi ‘i lenei itūlagi ma le gālulue fa’atasi ‘o mālō ‘e soālaupule ni tali ‘o ni matā’upu, ‘o ni vāega ia ‘o lo’o tū mātilatila mai totonu ‘o lea māliliega ‘e tusa ai ma līpoti ‘a le Leitiō Niu Sila.

‘O vāega ‘o lo’o ‘ave ‘i ai le fa’amuamua ‘o lo’o ‘i totonu ‘o lea pepa ‘o fa’amatalaga, ‘e aofia ai le mālosi’aga ‘e tali ai ‘i fītā ‘e feagai ma le tamāo’āiga, si’osi’omaga, fefa’asoaā’iga ‘o tū ma aga fa’aleatunu’u, ‘o le ola laulelei ‘o aga feso’ota’i ma le gālulue so’oso’otau’au ‘i so’otaga ma isi mālō ‘ina ‘ia ‘ausia se sini ‘o lo’o tulituliloaina.

Na fa’aalia ‘e se so’o’upu mō le Minisitā ‘o le Vā ‘i Fafo ‘a Niu Sila, Vaovasamanaia Winston Peters, ‘o le ‘ā iloilo ‘i le taimi nei ‘e le mālō, le māliliega ‘a le Atu Kuki ma Saina.  ‘Ua iai le fa’anaunauga ‘o Vaovasamanaia ‘e talanoa ai ma le faigāmālō ‘a Le Atu Kuki ‘i lea matā’upu ‘i nai aso ‘o lumana’i.

Link to RNZ (Article) translated: https://www.rnz.co.nz/news/political/542268/cook-islands-government-releases-details-of-deal-with-china

ATA: Cook Islands Office of the Prime Minister / RNZ.