Tasi le ‘ai na faiā’ina ai le Moana Pasifika ‘i lana ta’aloga muamua ‘o le Lakapī Supa ‘o le 2025

‘O lea ‘ua ‘āmata le ta’amilosaga ‘o le Lakapī Supa ‘a le Pasefika ‘i lenei tausaga, ma sā molimauina ai ‘i le fa’ai’uga ‘o le vaiaso nī ta’aloga mata’ina ma le taufao.

Na mālō le Chiefs ‘i le Blues ‘i ‘ai ‘e 25 ‘i le 14, ‘o le Crusaders na mālō ‘i le Hurricanes ‘i ‘ai ‘e 33 ‘i le 25, ‘a’o le Warratahs na mālō ‘i le Highlanders ‘i se tasi ‘o ta’aloga taufao ‘i ‘ai ‘e 37 ‘i le 36.

‘O le ‘au ‘a Fiti ‘o le Drua na faiā’ina ‘i le Brumbies  ‘e 36 ‘i le 32 ‘a’o le ta’aloga sā fa’atali iai le to’atele, ‘o le ta’aloga lea ‘a le Moana Pasifika ma le Force ‘a ‘Ausetālia, ‘ona ‘o le ulua’i ta’aloga lea ‘a le latou kapeteni fou ‘ua iai nei ‘o Ardie Savea, talu ‘ona se’e atu iai mai le Hurricanes ma ‘e pei ‘ona silasila iai, ‘e tasi ā le ‘ai na faiā’ina ai le Moana Pasifika, ‘e 44 ‘i le 45 ‘a le Force.

ATA: Moana Pasifika FB