Fa’apopoleina le Ta’ita’i ‘o le Itū Āgai ‘i le tūlaga fa’alētonu ‘ua o’o iai le vā fealoa’i ‘o Niu Sila ma le Ātu Kuki 

‘Ua fa’aalia ‘e le ta’ita’i ‘o le Labour iā Chris Hipkins lona popōle ‘I le tūlaga fa’alētonu lea ‘ua o’o iai le vā fealoa’i ‘o Niu Sila ma le Mālō ‘o le Ātu Kuki, po’o le Cook Islands. ‘O ia lagona ‘o le ta’ita’i ‘o le itū āgai, ‘ua fa’ailoa mai, ‘i le taimi ‘ua malaga ai ‘i le laumua ‘o Saina ‘i Beijing le pālemia ‘o le Ātu Kuki ‘o Mark Brown mō le sainia ‘o se feagaiga ‘i le vā ma le Mālō ‘o Saina ‘ae ua fa’aalia mai ‘e le faigāmālō so’ofa’atasi ‘a Niu Sila, ‘e le’i fa’ailoa ina mai ‘e le palemia ‘o le Ātu Kuki lea tūlaga ‘iā ‘i lātou.

‘O le Feagaiga So’ofa’atasi ‘i le vā ‘o le Ātu Kuki ma le Mālō Niu Sila, lea ‘e fa’aigoaina ‘o le Joint Centenary Declaration, ‘e mana’omia ai itū ‘e lua ‘e feso’ota’i ma talanoa so’o ‘i matā’upu ‘e a’afia ai le puipuiga ‘ātoa ma le sāogalēmū.

‘O le feiloa’iga ‘a le palemia iā Christopher ma le ‘au tusitala ‘i le māe’a ai ‘o le fono ‘a le kapeneta ‘i le Aso Gafua, na ia tā’ua ai, se tūlaga lē sa’o ‘o le palemia ‘o le Ātu Kuki. Na tā’ua ‘e Luxon, ‘o so’o se matā’upu ‘e a’afia ai le puipuiga po’o le sāogalēmū, ‘e matuā tāua lava ‘i le Mālō Niu Sila, ma ‘e tatau ona fa’ailoa mai ‘e le palemia ‘o le Ātu Kuki, ‘e pei ona mana’omia ‘i le feagaiga ‘i le vā ‘o Mālō ‘e lua. Na tā’ua fo’i ‘e le palemia ‘o Niu Sila, ‘o lo’o manino fo’i ‘i le fa’avae ‘o le Mālō ‘o le Ātu Kuki lea tūlaga, ma e tatau lava ona feso’ota’i ma fa’ailoa mai se tūlaga fa’aea ‘e ono aliali mai.

Peita’i lā, na fa’aalia mai ‘e le ta’ita’i ‘o le Labour, ‘iā Chris Hipkins, ‘e lē ‘o fesoasoani le itū’āiga ‘o feso’ota’iga ia ‘o lo’o fa’aaogā ‘e le faigāmālō so’ofa’atasi ‘i lenei matā’upu. ‘E manatu Hipkins, ‘e tatau ona sui se isi faiga ‘a le faigāmālō ‘e fa’aleleia ai lenei matā’upu ‘aemaise ‘o lona vā fealoa’i ma le Ātu Kuki.

Sā ia tā’ua fo’i ‘e lē tatau ‘i le faigāmālō so’ofa’atasi, ona fa’aaogāina le faiga fa’aaliali mālosi lea na fa’aaogā ‘e tāofia ai tupe ‘o polokalame fesoasoani mō le Ātu Kiribati, ‘i le matā’upu lenei. ‘Ae pei ona fa’ailoa ‘e le ali’i palemia iā Christopher Luxon, ‘e ui ina iai ‘ese’esega ‘i le vā o Mālō ‘e lua, ‘ae ‘o lo’o lelei pea lō lā’ua vā fealoaloa’i fa’amālō.

Link to RNZ (Article) translated by Lauano Ati Ilaoa: https://www.rnz.co.nz/news/political/541463/opposition-concerned-by-diplomatic-row-between-new-zealand-government-and-the-cook-islands

ATA: Sāmoa Capital Radio (file).