Toe fa’atūlaga ‘e le mālō le visa mō tagata ‘e fia ‘inivesi a lātou tupe ‘i totonu ‘o Niu Sila

‘O ‘Aperila lea ‘ua fa’amoemoe le Mālō So’ofa’atasi, ‘e ‘āmata ai ‘ona toe fa’amamalu suiga ‘o le visa fa’apitoa mō tagata ‘e fia ‘inivesi ma fa’afaigāluega a lātou tupe ‘i totonu ‘o Niu Sila.  ‘O le agaga ‘autū ‘o lea fuafuaga, ‘ina ‘ia fa’atōsina mai ai sēleni ma tupe mai fafo ‘i totonu ‘o le atunu’u.

Na tā’ua mai ‘e se tasi ‘o lōia tau fēmalāgā’iga, ‘o le sā ma le tapu lea ‘o lo’o iai nei mō tagata mai fafo ‘e fia fa’atauina ni fanua ‘i totonu ‘o Niu Sila, ‘o le fa’afītāuli ‘autū lea ‘ua tau lē fia āga’i mai ai tagata ‘e iai tupe mai atunu’u’i fafo ‘e fia fai ni a lātou pisinisi ‘i totonu ‘o Niu Sila.
Peita’i, ‘o lenei fuafuaga ‘a le faigāmālō so’ofa’atasi, ‘o lo’o tē’ena mālosi ‘e le Pātī ‘a le Labour, ‘ona ‘o nisi ‘o fa’afītāuli sā mātauina ai mai aso ‘ua mavae.

‘O suiga ‘ua mana’o le faigāmālō ‘e faia ‘i lenei Tūlāfono, lea ‘e ‘āmata fa’amamalu ‘i le aso muamua ‘o ‘Aperila, ‘o le ‘ā lē toe mana’omia ai le tagata ‘e talosaga ‘i lenei visa, ‘ina ‘ia iloa ma mālamalama ‘i le Gagana Peretānia.

Link to 1News (Article) translated by Lauano Ati Ilaoa: https://www.1news.co.nz/2025/02/09/government-announces-plan-to-adjust-migrant-investor-visa-settings/

ATA: 1News