Maua lava mea sesē ‘a’o faitau le pālota – Komisi ‘o Faigāpālota

‘Ua fa’amautū mai ‘e le Komisi mō Faigāpālota ‘i tagata Niu Sila, ‘o lo’o lelei ma aogā a latou siaki pei ‘ona fa’atūlagaina, ‘ina ‘ua maua ni sasi ‘i le faitauga muamua ‘o le faigāpālota. Na līpotia ‘e le ‘upegatafā’ilagi ‘a le Crux, ‘e fa’apea na fa’amauina ‘e le vaega fa’a’upufai ‘a le Opportunity ‘e lēai ni a lātou pālota ‘i se fale pālota ‘i Arrowtown ‘e ui na fa’aalia ‘e ni tagata pālota se to’alua, na o lā pālota mō le Opportunity ‘i lea fale pālota.
‘I se pepa ‘o fa’amatalaga, na fa’amaonia ai ‘e le komisi, na māfua lea fa’alētonu ‘ona ‘o se sesē ‘i le tu’uga ‘i totonu ‘o fa’amaumauga ‘ina ‘ua tāpunia le faigāpālota. ‘O le faitauga muamua ‘o le pālota, e lē o ni fa’ai’uga āloa’ia mā ‘e ono iai fo’i ma ni sesē. ‘O le ala lea na o lātou fesiligia ai le pule ‘o le itūmālō faipālota ma sā iai se fa’amaumauga na sesē ‘ona fa’amauina ‘i le pō ‘o le faigāpālota ma na toe fa’asa’o ‘i le taimi na faia ai le faitauga āloa’ia.
Na fa’aalia ‘e le komisi, ‘o le fa’agāsologa ‘o le faitauga āloa’ia ‘o le pālota, ‘o lo’o aofia ai ma le toe faitauga ‘ātoa ‘o pālota, ma toe siaki au’ili’ili ‘ina ‘ia iloa ni sasi ma ni sesē ‘o iai.
Na fa’ailoa ‘e le ‘ōfisa sili ‘o le ‘ōfisa ‘o faigāpālota, ‘o lo’o tūmau pea ‘ona fa’atūlaga le aso 27 Nōvema, ‘e fa’alauiloa ai le i’uga ‘o le faitauga āloa’ia ‘o le faigāpālota.
Link to RNZ (Article): https://www.rnz.co.nz/news/politics_election-2026/2678919/electoral-commission-says-vote-counting-mistakes-being-picked-up
IMAGE/ATA: Getty Images / Hagen Hopkins (RNZ).
