Tali Vaovasamanaia Winston Peters ‘i osofa’iga ‘o meatau mata’utia ‘a Lūsia

‘Ua fa’aalia ‘e le Minisitā ‘o le Vā ‘i Fafo Vaovasamanaia Winston Peters, ‘ua fai si popole tele ‘o Niu Sila ‘i le i’uga ‘o ni su’esu’ega, ‘o Lūsia na faia osofa’iga ‘o meatau ‘o vailā’au mata’utia ‘i le taua ma Ukraine. Na faia ‘e Ukraine se su’esu’ega, na lagolagoina lea ‘e le fa’alāpotopotoga ‘e fa’amautū ‘i Hague, lātou te mata’itūina le fa’asāina ‘o ‘au’upega ‘o vailā’au ‘o’ona, ma iloa ai, na fa’aaogāina ‘e Lūsia ni kasa fa’atagi mata ‘i fitafita Ukraine.
Na māua ‘i le līpoti, ‘e fa’apea ‘o le māsina ‘o Sētema 2024, na fa’aaogāina ai ‘e vaegā’au ‘a Lūsia se masini fa’alele fa’atonutonu (drone), ‘e fa’apa’ū ifo ai se pomu ‘o lo’o iai vailā’au ma le kasa ‘e tā’ua ‘o le CS gas ‘i fitafita ‘a Ukraine ‘o lo’o pito ‘i luma. ‘O le fa’aaogāga ‘o le kasa ‘o’ona ‘o le CS (CS gas) ‘e fai ma ‘au’upega ‘i taua, ‘ua fa’asāina ‘i lalo ‘o le Feagaiga Fa’avāomālō ‘e Fa’asā ai ‘Au’upega ‘o Vailā’au ma Kasa ‘o’ona(Chemical Weapons Convention), lea na saini ai fo’i Lūsia ma ‘ua ‘avea ai ma ona sui ‘āuai.
Na fa’aalia ‘i se tusitusiga ‘a Vaovasamanaia ‘i luga ‘o ‘upega ‘o feso’ota’iga, ‘e lē tusa ai ma le tūlāfono fa’avāomālō, le gāioiga lea na fa’aaogāina ai ia ‘au’upega, ma ‘ua ātili ai ‘ona fa’apopoleina le lalolagi ‘i le leva ‘ona iai ‘o ni ātugaluga ‘e uiga ‘i le lē mulimulita’i ‘o Lūsia ‘i ana matāfaioi ma ona tiute tau’ave ‘i lalo ‘o le Feagaiga Fa’avāomālō ‘e Fa’asā ai ‘Au’upega ‘o Vailā’au ma Kasa ‘o’ona (Chemical Weapons Convention).
‘Ua ‘uma ‘ona vala’au Niu Sila ‘iā Lūsia ‘ina ‘ia mulimuli ma usita’ia ona tiute ‘e tusa ai ma le tūlāfono fa’avāomālō, ma ‘e tūmau pea ‘ona tāmau Niu Sila ‘i lana lagolago ‘i tūlāfono ‘a le lalolagi ‘e fa’asaga ‘i ia itū’āiga ‘au’upega, fa’atasi ai ma le talia ‘o fa’ai’uga pe ‘ā fai ‘ua solia ia faiga fa’avae.
Link to RNZ (Article): https://www.rnz.co.nz/news/politics/2660780/deeply-concerned-winston-peters-reacts-to-russia-s-chemical-weapons-attacks
IMAGE/ATA: NICK MONRO / RNZ
