Fa’alauiloa ‘e le INZ ta’iala ‘o tamaiti vaetama mai fafo

‘Ua fa’amanatu ‘e le ‘Ōfisa ‘o Femalāgāa’iga ‘a Niu Sila ‘i la lātou ‘aufaigāluega, tu’utu’uga ‘o lo’o ta’ialaina ai le faiga ‘o visa ‘e fa’atatau ‘i le vaetamaina mai ‘o tamaiti ‘e fānanau ‘i atunu’u ‘i fafo, peita’i na fa’ailoa ‘e le ‘ōfisa ‘e lē mailoa pē to’afia.
‘O le fa’amoemoe ‘o le vaetamaina ‘e tusa ai ma tū ma agaifanua (customary adoption), ‘ia faia lea ‘e tagata ‘o le aiga lautele po’o le ‘āiga potopoto ‘o lo’o nonofo ‘i le atunu’u lava ‘e tasi ma le tamaititi, ‘ae lē ‘o tagata ‘o lo’o aumau ‘i Niu Sila.
‘O le tausaga talu ai, na tāpunia ai ‘e le Mālō, le vala lea na mafai ‘ona vaetama mai ni tamaiti mai atunu’u ‘i fafo ‘e ala ‘i le ‘alo ‘ese mai ‘i iloiloga ma su’esu’ega ‘e faia ‘e le Fa’amasinoga ‘o ‘Āiga (Family Court). Na iai matā’upu na ālia’e mai ‘i nisi ‘o tamaiti vaetama, ‘ona na a’afia ‘i sauaga ma faia fa’apologa ‘e aofia ai sauaga matagā, ta fasi ma fa’amālosia ‘e faigāluega.
‘E iai nisi mātua fai, ‘e silia ma le ta’i sefulu tamaiti na o lātou vaetamaina, ‘ae sā iai o lātou mōliaga muamua na fa’amaonia ‘i le fa’amasinoga ‘e uiga ‘i faiga fa’avevesi ma sauaga matagā, ‘e aofia ai ma se ‘āiga na su’esu’eina ‘e leoleo ‘i le ‘aumaia ‘o tamaiti ‘ona fa’aaogā lea ‘i ni faiga lē talafeagai. Na lē mafai ‘e nisi ‘o mātua ‘i Niu Sila ‘ona vaetama tamaiti mai isi atunu’u, ‘e le’i sainia pe fa’amaonia le Feagaiga Fa’avaomalo ‘i le Vaetamaina ‘o Tamaiti (Hague Convention), se’i vaganā ai ni nai māfua’aga fa’apitoa ‘e fa’atagaina ai.
‘I ni ta’iala na fa’ailoa atu ‘i le ‘aufaigāluega ‘a le ‘ōfisa ‘o femalāgāa’iga ‘a Niu Sila, ‘ua tā’ua ai ‘e le ‘ōfisa, ‘e lē tatau ‘ona lātou fa’alagolago tasi ‘i se folafolaga tusitusia ‘a mātua ia ‘o le ‘ā vaetamaina tamaiti, ‘ina ‘ia mafai ai ‘ona agava’a tamaiti mō visa, ‘e tatau fo’i ‘ona agava’a na’o tamaiti lāiti ia ‘e vaetama mai atunu’u ‘i fafo.
‘E tatau ‘ona ‘ausia tu’utu’uga fa’apitoa ‘o le vaetamaina ‘o tamaiti, ‘e aofia ai aiaiga, ‘o le tatau lea ‘ona vaetama ‘a’o lāiti, ma ‘ia vaetamaina fo’i ‘i tagata ‘o ‘āiga lautele ‘e lē ‘o ni tagata nofo mau ‘i Niu Sila ‘i le taimi ‘a’o fa’agāsolo le vaetamaina ‘o tamaiti.
‘Ā fai ‘o le tamaitiiti ‘e 10 tausaga pe i luga atu, ‘o le ‘ā lē aofia ‘i totonu ‘o le aiaiga lea ‘o se tamaititi la’itiiti ‘e mafai ‘ona vaetamaina.
‘O le customary adoption, ‘e tatau ‘ona tupu ‘i le atunu’u ‘o le tagata ‘o lo’o fa’alagolago ‘i ai le tamaitiiti ma ‘ia mulimulita’ia fa’atinoga ‘o tū ma agaifanua pei ‘ona fa’amauina. ‘Ā fai ‘o mātua ia ‘e fia vaetamaina le tamaitiiti ‘e māsani ‘ona aumau ‘i Niu Sila, ‘i le taimi ‘a’o fa’agāsolo le vaetamaina ‘o le tamaitiiti, ‘o lona uiga, ‘e atagia mai, ‘e lē ‘ausia aiaiga ma fa’atūlagaga ‘o tamaiti vavae ‘i totonu ‘o le atunu’u ‘o le tamaitiiti pei ‘ona līpotia ‘e le leitiō Niu Sila.
Link to RNZ (Article): https://www.rnz.co.nz/news/community/2631361/guidelines-on-customary-adoptions-of-overseas-children-issued-by-immigration-nz
IMAGE/ATA: RNZ
