Fa’amaonia le fa’ailoga ‘i le ‘aufaigāluega ‘a le RNZ ‘i le vāiaso nei gāluega ‘o le ‘ā fa’amālōlō

by | Nov 18, 2026 | Niu Sila

Na fa’amaonia ‘i le aso ananafi ‘e le Leitiō Niu Sila, ‘o le vāiaso nei, ‘o le ‘ā fa’ailoa atu ai ‘i le aufaigāluega, po’o ā tonu gāluega ‘e 58 ia ‘o le ‘ā fa’amālōlō pe vāea.

‘O le vāiaso talu ai, na fa’alauiloa ai le lata ‘i le $12 miliona ‘o tupe gau ‘a le leitiō fa’asalalau, ‘ua sili atu ma le fa’aluasefululima mai le $470,000 lea na valo’iaina muamua ‘e fa’apea ‘o tupe gau ia ‘o le tausaga fa’aletupe ‘e o’o mai ‘iā Iuni ‘o le tausaga nei.

‘O le taimi ‘o taumafataga ‘o le aoauli na fa’atino ai le solo tete’e ‘a le ‘aufaigāluega ‘i le Aso Lua ‘i fafo ane o o lātou ‘ōfisa ‘i ‘Aukilani ma Uēligitone.  Sā auaua’i le ‘au tusitala, ‘o ‘i lātou ‘i le pūlega fa’apea ma sui ‘o iuni, ma fa’alealea a lātou fu’a ma fa’ailoilo ‘i le taimi na fa’atino ai le tete’e pe tusa lea ma le tasi le ītūlā le ‘umi.

Peita’i ‘i se ‘īmeli ‘a le pule sili lē tūmau, Mark Stevens, ‘o tagata faigāluega ‘ia ‘o le ‘ā āfāina a lātou gāluega, ‘o le ‘ā fa’asolosolo ‘ona vāea mai le vā ‘o Tēsema ma le aso 31 Mati.  ‘E iai le talitonuga ‘o le ‘ā o’o atu ‘i le $2.5 miliona le tupe ‘e fa’aalu ‘i tagata ‘o le ‘ā vāea.  Mā ‘o le Leitiō Niu Sila, ‘o le ‘ā iloiloina le ‘aufaigāluega ‘o le ‘ā a’afia, pe ‘ā māe’a soālaupulega ma le ‘aufaigāluega ‘o le ‘ā vāea, fa’apea ai ma sui ‘o iuni pei ‘ona tā’ua ‘e le pule sili lē tūmau. 

‘I se pepa ‘o fa’amatalaga ‘a le PSA po’o le ‘Asosi ‘a Tagata faigāluega ‘a le Mālō fa’apea ai ma le E tū, ‘ua fa’atopetope le faiga ‘o lea fa’ai’uga mā ‘e lē talafeagai, lēai se līpoti, ‘e fa’amatala ma fa’amaonia ai le mana’omia ma le aogā ‘o le faia ‘o lea fuafuaga.  ‘O le Aso Gafua na fa’ase’etuāgalu ai le pule sili Paul Thompson mai lana gāluega.

Link to RNZ (Article): https://www.rnz.co.nz/news/business/2637752/show-us-the-alternatives-rnz-staff-protest-job-cuts-outside-offices

IMAGE/ATA: RNZ / Mark Papalii