Lapata’iga ‘a Gerry Brownlee; ‘aua ne’i fa’atopetope le fa’atūga ‘o se faigāmālō ‘a’o le’i o’o ‘i le Kerisimasi

‘Ua fa’aleo se finagalo po’o se lapata’iga ‘a lē sā Fofoga Fetalai, Gerry Brownlee ‘i le faigāmālō ‘ua tuana’i atu, ‘i vāega fa’a’upufai ‘uma, ‘ina ‘aua ne’i fa’anatinati le fauga ‘o se faigāmālō ‘a’o le’i o’o ‘i le Kerisimasi, ‘ona ‘e iai lona manatu, ‘e ono i’u ai ‘ina fai se māliliega lē lelei.
Na ia tā’ua, ‘o nisi ‘o tu’utu’uga na faia ‘e le Pāti ‘a le National mō ana pā’aga i le faigāmālō so’ofa’atasi talu ai, ‘e aofia ai le ACT ma le New Zealand First, ‘ātonu na māfua ai ‘ona fa’aitīitia le lagolago ‘a tagata pālota ‘i la lātou pātī. Na fautuaina ‘e Brownlee ē ‘o faia soālaupulega, ‘ina ‘ia lava se taimi ‘e fa’atalanoa ma maua ai se māliega lelei, nai lō le fa’atopetope ‘ona ‘o le fia ‘ausia ‘o le taimi fa’atapula’aina.
‘Ā fai ‘o lo’o fa’a’avega mamafa le fa’avae ‘o se faigāmālō a’o le’i o’o ‘i le Kerisimasi, ‘e lē afaina po’o ai ‘o lo’o iai ‘i le laulau ‘o feutana’iga, ‘e mautinoa lava ‘o le ‘ā lagona ‘e ‘i lātou lea tūlaga mai tagata lautele pei ‘ona saunoa ai Brownlee. ‘E tusa ai ma le i’uga ‘o le pālota, ‘e 67 nofoa lē tūmau ‘a le faigāmālō so’ofa’atasi lea na tuana’i atu nei, ‘o lo’o iai ‘i le taimi nei, mai le 131 ‘o nofoa ‘o le Palemene. Peita’i, ‘e ono toe suia lea tūlaga pe ‘ā fa’asalalauina le i’uga āloa’ia ‘o le pālota ‘i le aso 27 ‘o Nōvema, ‘e aofia ai ma le tusa ma le 400,000 ‘o pālota fa’apitoa (special votes).
‘Ina ‘ua fesiligia Brownlee ‘e fa’atatau ‘i le i’uga ‘o le faigāpālota, sa ‘ia ‘ioeina le maualalo ‘o le lagolago mō le Pātī ‘a le National, lea ‘e na’o le 29 pasene. Peita’i, sā ia fa’ailoa le manumālō ‘o le National ‘i itūmālō fa’apālota ‘e 42.
Na ia fa’ailoa fo’i, ‘ātonu na fa’aitīitia le lagolago mō le Pātī ‘a le National ‘ona ‘o le tele ‘o a’afiaga ma mana’oga ‘o ana pā’aga ‘i totonu ‘o le faigāmālō so’ofa’atasi, ‘e aofia ai ma le māliliega ‘a le ACT ‘e fa’atāuaina le Tūlāfono Tau Fa’aofi ‘e fa’atatau ‘i Matā’upu Fa’avae ‘o le Feagaiga ‘o Waitangi (Treaty Principles Bill).
Link to RNZ (Article): https://www.rnz.co.nz/news/politics/2634943/gerry-brownlee-cautions-against-rushing-to-form-government-before-christmas
IMAGE/ATA: RNZ / Angus Dreaver
