Fa’asala se ali’i mai le Hutt Valley ‘i le lata ‘i le 30 tausaga ‘i le falepuipui ‘ona ‘o le ‘aisa

‘E lata ‘i le 30 tausaga ‘ua fa’asala ai se ali’i mai le Hutt Valley ‘i le falepuipui, ‘ona ‘o soligātulafono tau vailā’au ma fuālā’au fa’asāina.
‘O le ali’i ‘o lo’o a’afia, ‘o Samuel Vaisevuraki, ‘e 27 tausaga lona fa’asalaga ‘i le falepuipui, ‘ona ‘o lona a’afia ‘i se taupulepulega ‘e fa’aulufale mai ‘i totonu ‘o le Hutt Valley le aofa’iga ‘e ‘afa tone ‘o le ‘aisa, po’o le methamphetamine.
‘O vailā’au fa’asāina ‘o lo’o aofia ‘i lenei matā’upu, ‘e lē gata ‘i se vaega tele ‘o le cocaine ma le MDMA, ‘ae fa’apea fo’i ma le 500 kilokalama ‘o le methamphetamine.
‘O le Aso Faraile talu ai na lauina ai lona fa’asalaga ‘i le Fa’amasinoga Maualuga ‘i Ueligitone.
Na fa’ailoa mai ‘e le ali’i leoleo, Regan Duncan, ‘o le umi ‘o le fa’asalaga ‘o lenei ali’i ‘e atagia ai le mata’utia ‘o lana soligātulafono. ‘E iai fo’i le fa’amoemoe ‘o le ‘ā aogā lea ‘e fai ma lapata’iga mo isi ‘o lo’o faia pea lenei faiga ‘o le ‘aumaia fa’anānā ‘o vailā’au fa’asāina ‘i totonu ‘o le atunu’u.
Na ta’ua fo’i ‘e le ali’i leoleo, sa umi se taimi ‘o mata’itūina ‘e leoleo le ‘aumaia ‘o vailā’au fa’asāina mai fafo ‘i totonu ‘o le itūmālō ‘o le Hutt Valley, ma taunu’u ai ‘i lenei matā’upu.
Link to RNZ (Article): https://www.rnz.co.nz/news/crime-and-justice/2631412/hutt-valley-man-jailed-for-almost-30-years-on-meth-charges
IMAGE/ATA: Stuff
