Manatu Luxon ‘e ono o’o ‘i le lima vaiaso ‘o tālia le taunu’uga ‘o le pālota pe ‘ana leai suiga na faia ‘i le lesitalaina ‘o le ‘au pālota

by | Nov 17, 2026 | Niu Sila

‘E manatu Tuisinavemaulumoto’otua Christopher Luxon, ‘e ono o’o ‘i le lima vaiaso le umi ‘e fa’atali ai le fa’ai’uga ‘o le pālota, pe ‘ana leai suiga sa faia ‘e le Mālō ‘i le vave fa’amuta ‘o le lesitalaina ‘o le ‘au pālota.

Na ia ta’ua, ‘e ui ‘o lo’o talanoa ma ta’ita’i ‘o le pati ‘a le ACT, le NZ First fa’apea ma le pati fou ‘o le Opportunity, ‘ae ‘o le ‘ā leai ni talanoaga ‘e uiga ‘i le fa’avaeina ‘o se faigāmālō fou, se’ia māe’a ‘ona fa’ailoa mai le faitauga aloa’ia ‘o le pālota.

‘O lea fa’aaliga ‘a le ali’i Palemia tausi ‘o le atunu’u na tu’uina mai, ‘e ui sa fa’aalia ‘e se tasi ‘o lōia fa’apitoa, ‘e leai se mea ‘e tau fa’atali ai fua le faia ‘o ia talanoaga ‘i le taimi nei.

Na fa’aalia fo’i ‘e le ta’ita’i ‘o le National, ‘e lē sa’o tu’ua’iga ‘ua fa’asalalauina ‘e fa’apea, ‘ua se’e mamao atu le latou pati ‘i le itu taumatau, ma ‘e lē tatau ‘i le ‘au pālota ‘ona fa’atuatuaina ‘o ia, talu ai ana folafolaga sa faia ‘e fa’apea ‘e lē mafai ‘ona lātou gālulue ma le pati ‘o le Opportunity.

Pei ‘ona silafia, ‘o le māfua’aga ‘autū na tu’uina mai ‘e le Mālō mo le vave fa’amuta ‘o le lesitalaina ‘o tagata pālota, ma lē toe mafai ai ‘ona lesitala se isi ‘i le aso tonu ‘o le pālota, ‘ina ‘ia vave ai ‘ona maua le fa’ai’uga.

Peita’i, ‘e ui ‘ina faia lea suiga, ‘ae ‘o lea lava ‘e tolu vaiaso le umi ‘e fa’atali ai le faitauga fa’ai’u ‘o pālota ‘uma. ‘O le umi lava lea sa fa’atali ai fo’i le taunu’uga ‘o le pālota tele talu ai ‘i le 2023.

‘Ua atili ai ‘ona fesiligia ‘e le to’atele le agaga tonu ‘o le faigāmālō na māfua ai ‘ona lē toe talia tagata ‘e lesitala ma pālota ‘i le aso tonu ‘o le pālota ‘i lenei tausaga.

Link to RNZ (Article): https://www.rnz.co.nz/news/politics/2625484/luxon-says-wait-for-votes-could-have-taken-5-weeks-without-enrolment-changes

IMAGE/ATA: RNZ / Zach Cornelisen