16 faipule tuai ‘ua lē manuia ‘i le pālota

by | Nov 16, 2026 | Niu Sila

‘A ‘o tālia le taimi ‘e fa’ailoa mai ai le taunu’uga aloa’ia ‘o le faigāpālota tele ‘a Niu Sila ‘i le aso 7 ‘o le māsina nei, ‘ua aliali mai ‘e to’a 16 faipule tuai ‘o le Palemene ‘ua lē manuia, ma ‘o le ‘ā lē toe tula’i mai ‘i le pāea’iga fou ‘o le Palemene.

‘I le taimi nei, ‘a fua ‘i fuainumera ‘o lo’o iai, ‘e tele le avanoa ‘e o’o ai ‘i le 131 le aofa’i ‘o faipule ‘o le Palemene fou ‘o Niu Sila.

‘O le vaiaso ‘ua mavae atu nei na amata ai ‘ona tu’ua ‘o lātou ‘ōfisa ‘i le Maota ‘o le Palemene ‘e ali’i ma tama’ita’i faipule ‘ua faia’ina ‘i le pālota ‘i le Aso To’ona’i, 7 ‘o Novema.

Talu ai ‘o i lātou nei ‘e to’a 16 ‘e le’i toe tusi lima iai le ‘au pālota, ‘e mautinoa lava ‘e leai se avanoa ‘e faia ai ni a lātou saunoaga fa’amāvae ‘i totonu ‘o le Palemene.

NATIONAL

Mo le pati ‘a le National, ‘o le minisita aupito sīnia ‘e le’i toe sao mai ‘i le pālota, ‘o Nicola Willis, lea sa se’ei ‘i le nofoa ‘o le Minisita ‘o Tupe. ‘A ‘o le’i avea ‘o ia ma faipule, sa gālue ‘i le ‘ōfisa ‘o John Key fa’apea ma le ‘ōfisa ‘o Bill English, ‘a ‘o avea ‘i lā’ua ma Palemia ‘o Niu Sila.

‘O le isi minisita sīnia ‘a le National na pa’ū, ‘o Paul Goldsmith, lea ‘e sefulu ma le tasi matāgāluega sa ia va’aia. ‘O lā’ua ma Nicola Willis ‘o minisita ‘autū ‘a le Palemia, Tuisinavemaulumatootua Christopher Luxon.

‘O isi minisita ‘ua lē toe tula’i mai ‘o le pati ‘a le National, ‘o Chris Bishop, lea sa tula’i mai ‘i le itūmālō ‘o Hutt South. ‘E ui ‘e le’i maua le taunu’uga ‘o pālota fa’apitoa, ‘ae ‘ua manatu Bishop ‘e foliga mai ‘e lē mafai ‘ona suia ai le i’uga mai le pō ‘o le Aso To’ona’i, lea ‘o lo’o sili ai pālota ‘a le tama’ita’i ‘o Ginny Andersen ‘o le pati ‘a le Labour.

‘E lē gata ‘i minisita sīnia nei ‘a le National, ‘ae ‘ua pa’ū fo’i ma le Fofoga Fetalai ‘o le Palemene ‘ua mavae atu nei, le ali’i ‘o Gerry Brownlee. Sa ‘ave iai le fa’alagiga ‘o le Tamā ‘o le Maota, ‘ona ‘o le umi ‘o le taimi na avea ai ma faipule. Na mua’i ulufale ‘o ia ‘i le Palemene ‘i le tausaga ‘e 1996, mai le itūmālō ‘o Ilam ‘i Kalaiesetete.

‘O isi faipule ‘a le National ‘e le’i toe fo’i mai, ‘o le tama’ita’i Saina ‘o Nancy Lu, fa’apea ma Melissa Lee, le ulua’i Korea ‘ua avea ma faipule ‘o Niu Sila.

‘Ae mo le ali’i ‘o Carlos Cheung mai Hong Kong, lea sa tula’i mai ‘i le itūmālō ‘o Mt Roskill, ‘e 262 pālota ‘o lo’o sili ai le sui tauvā ‘o le Labour, le ali’i ‘o Michael Wood, ‘a ‘o tālia le faitauga aloa’ia.

LABOUR

‘O le pati ‘a le Labour, ‘e to’afā ona faipule sa iai ‘i le Palemene ‘ua mavae na faia’ina ‘i le pālota ‘o le tausaga nei. ‘E aofia ai Deborah Russell ma Rachel Boyack.

FAIPULE NA FA’AMĀVAE ‘A ‘O LE’I FAIA LE PĀLOTA

‘O faipule na fa’amāvae ‘i totonu ‘o le ono māsina mulimuli ‘o le pāea’iga ‘ua mavae atu nei, ‘e aofia ai le to’aono mai le National. ‘O nisi ‘o i lātou ‘o Judith Collins, Chris Penk ma Shane Reti, sa ‘umia fo’i tofi minisita.

‘Ae mai le pati ‘a le Labour, ‘o Duncan Webb ma Greg O’Connor. ‘O le pati ‘a le ACT, ‘o Mark Cameron ma le tama’ita’i sa avea talu ai nei ma minisita ‘o le Kapeneta, ‘o Brooke van Velden.

Link to RNZ (Article): https://www.rnz.co.nz/news/politics_election-2026/2585373/the-16-mps-likely-voted-out-of-parliament

IMAGE/ATA: Alexia Russell/The Detail (RNZ),