‘E le’i maua se fa’ai’uga ‘a le NZFirst ‘i le faipule ‘o Michael Laws

‘I le taimi nei, ‘e le’i fa’ailoa mai se fa’ai’uga ‘a le pati ‘o le NZ First ‘i se tasi ‘o ona faipule fou, le ali’i ‘o Michael Laws, pei ‘ona folafola mai ‘e le ta’ita’i, Vaovasamanaia, ‘i nai aso ‘a ‘o lumana’i ai le pālota tele ‘i le aso 7 ‘o Novema.
Sa lē fiafia le ta’ita’i ‘o le NZ First ‘i le ali’i lenei ‘o Michael Laws, ‘ona ‘o ni ana lafoga sa faia ‘i luga ‘o lana polokalame sa fa’asalalau ‘i feso’ota’iga televavave, ‘e fa’atatau ‘i le sui faipule ‘o le pati ‘a le Opportunity, ‘o Kayla Kingdon-Bebb. Na faia ai ma le tautinoga ‘a Vaovasamanaia, ‘o le ‘ā fa’atali se’ia māe’a le pālota, ‘ona faia lea ‘o se fuafuaga ‘i le ali’i lenei ‘o Michael Laws.
Na mulimuli ane faia se fa’ato’esega ‘a Laws ‘e tusa ‘o ana fa’aupuga sa faia ‘e fa’atatau ‘i le sui faipule lenei ‘o le Opportunity.
Peita’i, ‘ua silia nei ma le vaiaso talu ‘ona ‘uma le pālota, ‘ae ‘e le’i fa’ailoa mai lava po’o fea ‘ua o’o iai lenei matā’upu.
‘O Michael Laws sa avea muamua fo’i ma faipule ‘i se taimi ‘e le’i mamao tele atu, ‘ae ‘ua toe sao nei ‘i totonu ‘o le Palemene, ‘i lona tūlaga ‘e numera ono ‘i le lisi ‘a le pati ‘o le NZ First.
‘Ua ‘uma fo’i ‘ona fa’ailoa mai ‘e le Palemia, Tuisinavemaulumatootua Christopher Luxon, ‘afai ‘e toe tula’i mai ‘o ia ‘e ta’ita’i le isi faigāmālō so’ofa’atasi, ‘e mautinoa lava ‘e lē aofia Michael Laws ‘i le Kapeneta, ‘ona ‘o lona tete’e ‘i lafoga sa faia ‘e Laws ‘i le tama’ita’i sui faipule ‘o le Opportunity.
Link to RNZ (Article): https://www.rnz.co.nz/news/politics/2610453/nz-first-still-considering-mp-michael-laws-future-in-the-party
IMAGE/ATA: RNZ / Samuel Rillstone
