Fa’ailoa ‘e le Microsoft le toe fa’aleleia ‘o fa’aletonu tau feso’ota’iga televavave

‘Ua fa’ailoa mai ‘e le kamupanī tele ‘o feso’ota’iga televavave fa’atekonolosi, le Microsoft, ‘ua toe fa’aleleia fa’aletonu fa’atekonolosi na motusia ai feso’ota’iga televavave ma a’afia ai ‘au’aunaga masani mo tagata fa’apea ma pisinisi ‘i le tele ‘o atunu’u ‘o le lalolagi.
‘O se fa’asilasilaga aloa’ia mai le Microsoft ‘i le taeao ‘o le Aso Sā, na ta’ua ai le māe’a ‘o taumafaiga ‘ina ‘ia toe fa’aleleia feso’ota’iga ‘uma sa a’afia, mo mālō ma kamupanī ‘i vaega ‘ese’ese ‘o le lalolagi.
‘O le kamupanī lenei ‘o le Microsoft, pei ‘ona silafia, ‘e fa’amautū ‘i totonu ‘o Amerika, ma ‘o se tasi ‘o kamupanī ‘autū ‘e pulea ma fa’afoeina ‘au’aunaga tau feso’ota’iga fa’atekonolosi ‘i le lalolagi ‘ātoa.
Na ta’ua ‘i le fa’asilasilaga ‘i luga ‘o le X, ‘ua toe fa’aleleia feso’ota’iga ‘imeli ‘i luga ‘o le Outlook fa’apea ma isi ‘au’aunaga. Na fa’amamafaina ai fo’i, ‘o le fa’aletonu na māfua ai ‘ona motusia nei feso’ota’iga, ‘o se fa’afitauli fa’ainisinia, ‘ae lē māfua mai ‘i ni osofa’iga ‘a le AI po’o nisi tagata atamamai.
‘O le Aso To’ona’i ‘ua mavae atu nei na tula’i mai ai lenei fa’aletonu, ma sa a’afia ai ‘au’aunaga ‘a le Microsoft ‘i atunu’u ‘e 74 ‘o le lalolagi, ‘e aofia ai Amerika, Europa, Asia, ‘Aferika ma le Pasefika.
Link to RNZ (Article): https://www.rnz.co.nz/news/world/2606267/microsoft-announces-service-restored-global-outage-over
IMAGE/ATA: Microsoft Facebook
