‘O le asō le aso mulimuli ‘o le Pule Sili ‘o le Radio New Zealand ‘i lana gāluega

‘O le asō le aso mulimuli ‘i lana gāluega ‘o le Pule Sili ‘o le Uaealesi Fa’asalalau ‘a Niu Sila, le ali’i ‘o Paul Thompson. ‘E tusa ‘ua ono vaiaso ‘ua vave ai nai lo le taimi ‘e tatau ‘ona ‘uma ai lana konekarate.
‘Ua māfua ‘ona vave tu’ua ‘e le ali’i pule le gāluega sa iai, ‘ona ‘o fa’aletonu tau tupe pei ‘ona alia’i mai nei ‘i totonu ‘o lenei fa’alāpotopotoga ‘a le Mālō ‘o Niu Sila.
‘E 13 tausaga ‘o avea Paul Thompson ma Pule Sili ‘o le Uaealesi Fa’asalalau ‘a Niu Sila, ma ‘o le aso 31 ‘o Tēsema lea sa fa’amoemoe ‘e ‘uma aloa’ia ai lona taimi ‘i lea tofiga.
‘O le amataga ‘o le vaiaso ‘ua mavae atu nei, na fa’ailoa ai fa’alaua’itele ‘e Thompson le gau ‘e tusa ma le $12 miliona tālā ‘o le RNZ, lea ‘o le ‘ā vāea ai ma fa’amuta gāluega ‘a tagata faigāluega tūmau ‘e to’a 58 ‘o le fa’alāpotopotoga.
‘O ‘Oketopa na fa’amāvae fa’afuase’i ai mai lona tofiga ‘i le RNZ le tama’ita’i sa ‘umia le tofiga ‘o le ‘Ōfisa Sili ‘o Tupe, ‘o Hilary Parker. ‘O le gau ‘ua fa’ailoa mai nei ‘e tusa ma le $11.8 miliona tālā, ‘ua fa’aluasefululima taimi ‘ua maualuga ai nai lo le gau sa fuafuaina muamua, ‘e tusa ma le $470,000 tālā, mo le tausaga na fa’ai’uina ‘i le māsina ‘o Iuni.
‘Ua fa’atulaga nei ‘e le komiti fa’afoe ‘o le RNZ le faia ‘o se su’esu’ega tūma’oti ‘i le māfua’aga ‘o lenei fa’aletonu tau tupe ‘ua feagai ma le Uaealesi Fa’asalalau ‘a le Mālō ‘o Niu Sila, le Radio New Zealand.
‘O le fa’auluuluga ‘o Tala Fou, le ali’i ‘o Mark Stevens, ‘ua tofia ‘e avea ma sui Pule Sili ‘o le fa’alāpotopotoga, ‘e amata fa’amālamalama ‘i le Aso Lua ‘a taeao.
Link to RNZ (Article): https://www.rnz.co.nz/news/business/2588894/rnz-chief-executive-paul-thompson-announces-early-departure-from-organisation
IMAGE/ATA: RNZ / Jeff McEwan
