Mālō Samoa ‘i le ta’aloga ma Potukale

by | Nov 16, 2026 | Ta'aloga

‘I lakapi iuni fa’avaomalo, na mālō le Manu Samoa ‘i le lā ta’aloga ma le ‘au ‘a le atunu’u ‘o Potukale ‘i le taeao ‘o le Aso Sā, sa faia ‘i le ‘a’ai ‘o Lisbon.

‘O ‘ai ‘o lea ta’aloga ‘e 36 Samoa ‘i le 5 ‘a Potukale. ‘Ae ‘i le tā ‘o le mālōlōga, ‘ua 24 ‘ai ‘o le Manu Samoa ‘i le leai ‘a Potukale.

‘O le taimi muamua lenei ‘ua faia ai se ta’aloga faitauina fa’avaomalo ‘i le vā ‘o le Manu Samoa ma le ‘au ‘a Potukale.

‘O lona lua ai lea ‘o mālō ‘o le Manu Samoa ‘i le ta’amilosaga ‘o lakapi fa’avaomalo ‘o lo’o fa’agasolo ‘i le taimi nei, ‘e ta’ua ‘o le Nations Cup.

‘O le ta’aloga ‘a Tonga ma le ‘au ‘a Georgia ‘i le ta’amilosaga lava lea, na mālō ai Georgia ‘e 53 ‘i le 31 ‘a Tonga.

‘Ae ‘o le ‘au ‘a Fiti, lea ‘o lo’o tauvā ‘i le ta’amilosaga ‘o le Nations Championship, na faia’ina ‘ia Aialani ‘i le lā ta’aloga sa faia ‘i le ‘a’ai ‘o Dublin. ‘O ‘ai ‘o lea ta’aloga ‘e 43 Aialani ‘i le 15 ‘a Fiti.

‘O lona lima ai lea ‘o faia’ina soso’o ‘o le ‘au ‘a Fiti, ‘e le’i maua so lātou mālō, ‘ae ‘ua toe tasi le latou ta’aloga ‘o lo’o totoe ‘i lea ta’amilosaga fa’avaomalo.

‘I Uelese, ‘ua ea le pologa ‘o le ‘au ‘a Uelese, ‘ina ‘ua faia’ina ai le ‘Olopeleki ‘a Niu Sila ‘i le lā ta’aloga ‘i le malae ‘i Cardiff, ‘i le vaveao ‘o le Aso Sā.

‘O ‘ai ‘o lea ta’aloga ‘e 35 Uelese ‘i le 28 ‘a le ‘Olopeleki.

‘Ua 73 nei tausaga talu ‘ona faia ta’aloga faitauina ‘i le vā ‘o ‘au nei ‘e lua, ‘ae ‘o lea fa’ato’ā maua ai le ulua’i mālō ‘o Uelese ‘ia Niu Sila.

‘E toe tasi le ta’aloga ‘o lo’o totoe nei ‘a le ‘Olopeleki ‘a ‘o iai ‘i Europa. ‘O le ta’aloga lea ma le ‘au ‘a Egelani ‘i le fa’ai’uga ‘o le vaiaso nei.

‘E to’atele ‘ua manatu, ‘afai ‘o le tūlaga lea ‘o le ‘Olopeleki, ‘e mautinoa lava ‘e mālō ai Egelani. Peita’i, ‘e fa’ato’ā iloa le auro ‘i le afi, pei ‘ona ta’ua ‘i lea fa’aupuga masani.

IMAGE/ATA: Manu Samoa Facebook