Tatau na tutū fa’atasi le National ma le Labour – fautua ai se faipisinisi pilionea

‘E manatu se tasi ‘o faipisini pilionea ‘e tatau ‘ona tutū fa’atasi le National ma le Labour ma gālulue fa’atasi.  Na fa’aalia ‘e Guy Haddleton ‘i le polokalame ‘o le Midday Report ‘a le Leitiō Niu Sila, ‘e lē fa’apea ‘ua ia fautuaina le faia ‘o se faigāmālō so’ofa’atasi telē, peita’i, ‘a lua ni vāega fa’a’upufai ‘e pūleaina le atunu’u, ‘e sili atu lea nai lō ni pātī se fā, ‘o taumafai ‘e fa’atopetope ‘ona fa’amāe’a le gāluega ‘i se taimi ‘o feagai ai ma ni lu’itau se tele. 

Na saunoa Haddleton, ‘ā fai ‘e mafai ‘ona faia se māliliega ‘a vāega fa’a’upufai ‘e lua ‘e fa’amaonia ma fa’atūmau ai le lagolago ‘a pātī ‘i la lā faipā’aga ‘i le mālō, ‘i matā’upu ma fuafuaga tāua mō le lumana‘i ‘o le atunu‘u, ma fa’agāsologa ‘o gāluega ‘a le Mālō (confidence and supply agreement), ‘e pei ‘o se iloiloga ‘o le MMP lea ‘ua manino mai lava, ‘e lē taumate ‘o le ‘ā matuā telē, peita’i, ‘e iai fo’i isi avanoa ‘o ‘inivesi ma ni tupe fa‘afaigāluega e mana‘omia ‘e le atunu‘u mō le isi lima ‘i le sefulu tausaga, ‘ātonu ‘o se ‘auala ‘e sili atu ‘ona lelei lea mō le atunu’u ‘i le taimi nei.

‘O le faigāpālota lenei, ‘ua molimauina ai le suia ‘o le lagolago ‘a le ‘au pālota ‘āga’i ‘i vāega fa’a’upufai lāiti, lea ‘ua mātauina le fiafia ‘o le Greens ma le ACT ‘i le maualuga ‘o le lagolago ‘ua o lātou mauaina, fa’atasi ai ma le ofi atu ‘o le Opportunity ‘i le Palemene mō le taimi muamua.

‘A tu’u fa’atasi pālota na maua ‘e le National ma le Labour mō le faitauga muamua, ‘e lata ‘i le 60 pasene peita’i na saunoa le ali’i pilionea, ‘o le 60 pasene, ‘o le lagolago lea ‘ua mafai ‘ona maua mai le ‘au pālota, ‘e ta’ita’ia ai le atunu’u. 

Na taumafai fo’i ‘e Siāmani, ‘Aialani ma Denmark ni fetu’una’iga fa’apea, ma sā sili atu ‘ona manuia ‘o isi atunu’u nai lō isi.

Link to RNZ (Article): https://www.rnz.co.nz/news/politics_election-2026/2533904/national-and-labour-should-combine-forces-billionaire-business-leader-says

IMAGE/ATA: RNZ.