Mana’o Matāgāluega ‘o Tupe mō lana va’ava’aiga ‘o le RNZ, ‘ia ‘avea ‘o se vāega ‘o le iloiloga fa’atūma’oti

‘Ua talosaga le Matāgāluega ‘o Tupe (Treasury) ‘ina ‘ia iloiloina fo‘i ma lana va’ava’aiga ‘o le RNZ, ‘o se vāega ‘o le iloiloga tuto‘atasi ‘o lo‘o faia ‘i le fa’alētonu tau tupe ‘a ‘au’aunaga fa’asalalau, lea ‘ua latalata ‘i le $12 miliona le tupe gau.

Na fa‘ailoa ‘e le Leitiō Niu Sila ‘i le Aso Gafua le telē ‘o le gau ‘e $11.8 miliona. ‘E silia ma le fa’aluasefulu le maualuga atu, nai lō le aofa‘iga ‘e $470,000 sā fuafuaina ‘o ni tupe gau ‘i le tausaga fa‘aletupe na fa‘ai‘uina ‘iā Iuni.  Na tā‘ua ‘e le ‘Ōfisa Sili ‘o le Pūlega ‘o le RNZ, Paul Thompson, ‘i le Aso Gafua, ‘e lē sa‘o fa‘amaumauga ma līpoti fa‘alōtoifale sā tu‘uina atu ‘e uiga ‘i le tūlaga tau tupe ‘a le fa‘alāpotopotoga. ‘O le māfua‘aga lea na fa‘ato‘ā iloa ai le telē ‘o le gau ‘i le māsina ‘o ‘Oketopa.

Na iai le fuafuaga ‘a le RNZ talu mai le māsina ‘o ‘Aukuso, ‘e fa‘aitiitia le ‘aufaigāluega ‘i le vā ‘o le 25 ma le 30 avanoa faigāluega.  Peita‘i, ‘ua aofia ai nei ia avanoa ‘i le fuafuaga fou ‘e fa‘aitiitia ai galuega ‘i le aofa’iga ‘e 58.  Na fa‘amaonia ‘e le Matāgāluega ‘o Tupe ‘i le aso ananafi, sā tu‘uina atu ‘e le RNZ ni fa‘amaumauga sesē, ma na fa‘ato‘ā iloa ‘e le Matāgāluega ia mea sesē ‘i le aso 4 ‘o ‘Oketopa.

Na tā’ua fo’i ‘e le Matāgāluega, ‘o le aotelega ‘o fa’amaumauga ia na lātou taulimaina, ‘e lēai se fa’ailoga ‘o ta’u atu ai, ‘e līpoti atu ‘e le leitiō se tupe gau ‘e $11.8 miliona mō le tausaga fa’aletupe ‘e o’o mai ‘iā Iuni.  ‘O le tupe na fuafuaina ‘e le ‘au’aunaga ‘o le ‘ā gau, ‘e tusa lea ma le $470,000.00.  ‘Ina ‘ua fesiligia pe lagolagoina ‘e le Matāgāluega le fuafuaga ‘e fa‘aitiitia gāluega ma tupe fa‘aalu, na tali ‘e fa’apea,  se matā’upu lea ‘e fītoi tonu ma le pūlega fa‘atonu ‘a le RNZ (RNZ Board).

Na tā’ua ‘e le Matāgāluega ‘o tupe, ‘o le ‘ā fautuaina minisitā ‘i le fuafuaga ‘a le komiti fa’atonu ma siaki pē fa’apēfea ‘ona fa’atinoina ‘e le Leitiō Niu Sila.  ‘O le taimi nei, ‘e le’o tali le fa’alāpotopotoga ‘o Tausi tusi ‘Ausetālia ma Niu Sila pe na tu’uina atu ni fa’aseā ‘e fa’atatau ‘i tupe ‘a le Leitiō Niu Sila.

Link to RNZ (Article): https://www.rnz.co.nz/news/politics/2491845/treasury-wants-own-oversight-of-rnz-to-be-part-of-independent-review

IMAGE/ATA: RNZ / Ruth Kuo