Tūmau ‘i le 2.75% le pasene tului ‘o tupe ‘a le Faletupe Fa’aleoleo

Na faateʻia le toʻatele ‘o tagata ‘i le fa’aiʻuga ‘a le Faletupe Fa’aleoleo ‘a Niu Sila (Reserve Bank of New Zealand – RBNZ), ‘ina ‘ua ‘ese’ese finagalo ‘o sui ‘o le komiti fa’atonu ‘i le pālota ma filifili ai ‘e fa’atūmau pea le tului ‘o tupe ‘i le tūlaga ‘o lo’o iai.  Peitaʻi, na tatala pea le avanoa ‘e toe si’itia ai tului ‘i le lumanaʻi, ‘ina ‘ia tāofiofia ai le mālosi ‘o le si’itaga ‘o le tau ‘o ‘oloa ma ‘au’aunaga.

Na fa’atūmau pea le Official Cash Rate (OCR) ‘i le 2.75 pasene, ‘e ui lava na matuā mautinoa ‘e le toʻatele ‘o tagata ‘o lo’o gālulue ‘i māketi tau tupe fa’apea ma le ʻau suʻesuʻe ‘o le tamāo’āiga, ‘o le ‘ā toe si’itia le pasene tului.

Na fa’ailoa ‘e le Komiti ‘o Faiga Fa’avae Tau Tupe ‘a le faletupe tūtotonu (Monetary Policy Committee – MPC), le fa’ateteleina ‘o le unaʻiga ‘ina ‘ia si’itia tau ‘o ‘oloa ma ‘au’aunaga, ‘o le lē mautinoa ‘o le tūlaga ‘o le tamāo’āiga, ma toe fa’amautinoa ai lona naunautaʻiga ‘e toe fa’aitīitia le tau ‘o ‘oloa ma ‘au’aunaga ‘ina ‘ia toe o’o ‘i le 2 pasene  pei ‘ona fuafuaina.

Na taʻua ‘i se fa’amatalaga ‘a le komiti, ‘e iai le fa’amoemoe ‘o le ‘ā si’itia le fua fa’atatau ‘o le tau ‘o ‘oloa ma ‘au’aunaga ‘i le tausaga ‘ātoa, ‘i le 4.4 pasene ‘i le kuata lea ‘e aofia ai Tēsema. ‘O lenei siʻitaga ‘e māfua mai ‘i tau ‘o le suāuʻu ‘o lo’o tatālia ‘i le taimi nei. ‘E lē o mautinoa valoʻaga ‘o le siʻitia ‘o tau ‘i se taimi lata mai, ‘ona ‘o le fesuisuiaʻi ‘o tau ‘o le suāuʻu ma ‘oloa tau ‘i suāuʻu ‘ua ‘uma ‘ona faamamā ma gaosia.”

Na lagolagoina ‘e le Kōvana ‘o le faletupe, Anna Breman, sui ‘e toʻatolu mai fafo ‘o le komiti, le fa’aiʻuga ‘e fa’atūmau le pasene tului ‘i lona tūlaga ‘o iai. Peitaʻi, na pālota isi sui ‘e toʻatolu, ‘o ‘i lātou ‘uma ‘o ni ‘ōfisa sīnia ‘o le RBNZ, ‘e si’itia le tului.

Link to RNZ (Article): https://www.rnz.co.nz/news/business/2203827/reserve-bank-holds-ocr-at-2-point-75-percent-in-split-decision

IMAGE/ATA: RNZ / Supplied