Mana’o le Komisi ‘o Faigāpālota ‘ia tele tupulaga resitala mō le pālota

‘Ua ta’utino ‘e le Komisi mō Faigāpālota ‘e le’o o’o le nūmera ‘o tupulaga talavou ‘e agava’a ‘e pālota ‘i le tūlaga ‘e tatau ‘ona iai, ‘ona ‘e i lalo ifo ‘o le 61 pasene tupulaga ta’i 18 āga’i ‘i le ta’i 24 tausaga ‘ua māe’a ‘ona resitala ‘ae le’o toe ‘ātoa se māsina ‘e resitala ai tagata mō le faigāpālota.

Na saunoa le ta’ita’i ‘o le Labour Chris Hipkins, ‘e tatau ‘i le Komisi ‘ona fai la lātou gāluega ma taumafai ‘ia resitala tupulaga, peita’i na saunoa le fa’auluuluga ‘o le ‘ōfisa, ‘o lea ‘o lo’o fa’agāsolo lava gāluega ma taumafaiga ‘a le komisi.  Na fa’aalia ‘e Karl le Quesne ‘i le Leitiō Niu Sila, sā ō le komisi ‘i totonu ‘o ā’oga ma taumafai ‘e fa’aopoopoina le nūmera ‘o tupulaga ‘e resitala, ma gālulue fo’i ma fa’alāpotopotoga ‘i tua fa’apea ma mafutaga ‘o tupulaga talavou.

Na saunoa Le Quesne, ‘e o’o mai ‘i le taeao ‘o le Aso Lua, ‘ua o’o atu ‘i le 91 pasene le nūmera ‘o tagata ‘ua resitala mō le pālota, peita’i, ‘o tupulaga talavou mai le 18 āga’i ‘i le 24 tausaga, ‘e i  lalo ifo  ‘o le 61 pasene.  ‘O fuainūmera mulimuli ‘i le 2023, ‘e 77 pasene mō le ta’i 18 āga’i ‘i le ta’i 24 tausaga na resitala. 

‘E tatau ‘ona o’o atu ‘i le vaeluaga ‘o le pō ‘o le Aso Sā 25 ‘Oketopa, ‘ua resitala tagata mō le pālota, ‘ona ‘e le’o toe mafai ‘ona resitala ma pālota ai lava ‘i le aso tonu ‘o le faigāpālota.

Link to RNZ (Article): https://www.rnz.co.nz/news/politics_election-2026/1653198/electoral-commission-wants-number-of-youth-enrolled-to-vote-to-be-a-lot-higher

IMAGE/ATA: RNZ / Russell Palmer