Oso mauāluga le lagolagoina ‘o le pātī ‘a le Greens ‘e le ‘au pālota ‘i le su’esu’ega ‘a le 1News-Verian Poll

‘O le taunu’uga, ‘ole su’esu’ega aupito lata mai nei ‘i manatu ma lagona ‘o le ‘au pālota, ‘ua manino ai le mauāluga ‘o le tūlaga ‘ua o’o iai le pātī ‘o le Greens, ma atagia ai le mafai lea ‘e le itū tauagavale ‘o le maota, ‘ona latou fa’avaeina lesi faigāmālō fou, pe ‘afai lea ‘e fa’aauau pea ‘ona musu le National ‘e gālulue fa’atasi ma le vāegafa’a’upufai ‘o le Opportunity Party.

‘O le sā’ili’iliga lenei, ‘a le 1News-Verian Poll ‘o lo’o tūtusa ai le National ma le Labour ‘i le ta’i 28 pasene, ‘e tusa lea ma le tasi le pasene ‘ua pa’ū ai le National, ‘ae lua pasene na pa’ū ai le Labour.

‘A fa’aliliu ia pasene ‘i nofoa ‘o le Palemene, ‘ona tūla’i mai lea ‘e ta’i 34 nofoa ‘o pātī ‘autū nei ‘e lua.

‘Ae ‘o le pātī ‘a le Greens, ‘o lea ‘ua o’o ‘i le 16 pasene le tūlaga lagolagoina ‘e le ‘au pālota sa fesiligia ‘i lenei sā’ili’iliga, ‘e tusa lea ma le 4 pasene ‘ua fa’aopoopo ‘i le tūlaga sa iai ‘i le su’esu’ega talu ai. ‘O lea aofa’iga ‘e maua ai ‘e le Greens nofoa ‘e 19 ‘o le Palemene.

‘E soso’o atu iai le pātī ‘a le ACT lea ‘ua tūla’i mai ‘i le 11 pasene, ‘e lua pasene ‘ua fa’aopoopo ‘a’o le pātī ‘o le NZ First, ‘e tasi le pasene na fa’aopoopo, lea ‘ua o’o ai ‘i le 9 pasene lona tūlaga lagolagoina ‘i le taimi nei.

‘O le pātī ‘o le Opportunituy Party, ‘e lua pasene na pa’ū ai ma tūla’i mai ai nei ‘i le 6 pasene po’o lona uiga ‘e tatau ‘ona maua ai ‘o latou nofoa ‘e fitu (7), ‘i totonu ‘o le Palemene.

‘E leai se suiga tele ‘i le pātī ‘a Māori, lea ‘e tasi le pasene ‘o lo’o tūla’i mai ai nei po’o le fā le aofa’i ‘o nofoa latou te maua ai.

‘Ae ‘o le pātī fou ‘o le Te Tai Tokerau Party, ‘e tasi lona nofoa ‘o lo’o iai nei ‘i le Palemene.

‘O le Ta’ita’i ‘e aupito agava’a mō le tofi Palemia, ‘o Tuisinavemaulumoto’otua Christopher Luxon, ‘e 19 pasene le tūlaga lagolagoina ‘e le ‘au pālota sa fesiligia.

‘O Chris Hipkins, ‘e 14 pasene, soso’o atu ai Chloe Swarbrick ‘o le Greens ‘i le 8 pasene, ‘ae tūtusa David Seymour ma Vaovasamānaia Winston Peters, ‘e ta’i 7 pasene.

E 1004 le aofa’i ‘o tagata pālota, sa fesiligia ‘i le su’esu’ega lenei sa faia ‘i le vā ‘ole aso 23 ma le aso 27 ‘o Setema.

‘O le agaga ‘o su’esu’ega nei, ‘ia maua ai sina ata fa’atusatusa ‘o le tūlaga ‘o iai lagona ma manatu ‘o tagata pālota mai lea taimi ‘i lea taimi, ‘ae lē ‘o se valo’aga lea ‘e tusa ‘o le taunu’uga ‘e ono o’o iai le faigāpālota ‘o lo’o loma nei.

Link to 1News (Article): https://www.1news.co.nz/2026/09/28/poll-greens-surge-to-best-result-ever-as-national-labour-slide-further/

IMAGE/ATA: SCR (file). Treasury logo, screengrab from Treasury Website.