Folafola e le Leipa le fa’afaigōfieina ‘o femālāgaa’iga ‘a tagata asiasi mai atu motu ‘o le Pasefika

‘Ua folafola ‘e le Vāega fa’a’upufai a le Leipa le isi ā lātou pōlisi ‘i le asō, ‘e fa’afaigōfie ai le fai malaga mai ‘o tagata mai atunu’u ‘o le Pasefila ‘i Niu Sila, ‘e ala i le fa’alauteleina ‘o avanoa ‘e malaga mai ai ‘e aunoa ma se visa mō tagatānu’u ‘o atunu’u ‘o lo’o aofia ‘i totonu ‘o le Pacific Island Forum.

Na fa’alauiloa ‘e le Sui Ta’ita’i ‘o le Leipa ma le so’o’upu mō Tagata Pasefika, Carmel Sepuloni, lea pōlisi ‘i le polokalame ‘a le Pacific Mornings ‘a le PMN ‘i le tāeao analeilā. Na saunoa Sepuloni, ‘o le faiga ‘o lo’o iai nei, ‘o lo’o ‘avea ma ‘avega mamafa ‘i ‘āiga Pasefika o lo’o aumau ‘i Niu Sila, ‘e taumafai ai ‘e fa’atupe le ‘aumaiga ‘o ō lātou tagata ‘i Niu Sila.

‘O le ‘ā mafai ai fo’i ona fō’ia le fa’afītāuli lea ‘e feagai ma le tele ‘o ‘āiga, ‘e tele ai ‘ina lē mafai ona malaga mai tagata ‘i fa’alavelave ona ‘o le lē manuia ‘o talosaga mō visa. ‘O le ‘a mafai ona malaga mai tagata mō le ‘umi ‘e tolu māsina ‘e aunoa ma se visa, ma ‘o le ‘ā maua le aotelega ‘o lea pōlisi ‘i se aso lata mai.

Link to PMN News (Article): https://pmn.co.nz/read/political/labour-pledges-wider-visa-waiver-travel-for-pacific-visitors

IMAGE/ATA: Labour Pacific Caucus / screenshot